【独家】最强新人 百毒不侵抗压力高 炎明熹面对负评：去完厕所唔记得

《声梦传奇》一班参赛者刚完成毕业演唱会，冠军兼三料得主炎明熹（Gigi）在台上大晒唱功和实力。由比赛期间，Gigi一直是话题人物，不论是歌艺、造型及家庭背景，但其实Gigi只是个16岁读F.4的少女，面对突如其来的高人气及压力，难得她有非一般16岁的思想，识得自我减压又会感恩，面对负面新闻仲搞笑形容去完个厕所就唔记得，看来以她的演艺潜力，加上有如运动员的心理质素，要在娱乐圈发围一定唔难啦！撰文：杜淑霞 摄影：梁有财

在《声梦》决赛夺得《专业评选大奖》、《观众热选大奖》及总冠军《传奇新星》，成为三料冠军的Gigi，事隔一个月竟然话觉得冇乜感觉，「𠵱家其实冇乜太大感觉，最大感觉系当日攞奖会好兴奋，同埋好神奇，其实李生（李克勤）都讲过攞冠军都系一晚嘅事，第二日最多有人同你讲恭喜或者叫你继续加油，到𠵱家其实冇乜感觉，哈哈！攞咗奖系一个荣誉，但系唔会觉得自己好犀利咁。」

感激「Gi炎粉」支持

比赛期间，一班《声梦》参赛者已经极受粉丝欢迎，被喻为「人气王」的Gigi更可以有商演活动搵真银，16岁女已有赚钱能力，Gigi好识谂只想用来帮补家人，「我觉得有赚钱能力系可以帮屋企分担一啲负担，我就希望可以帮到佢哋，然后再储钱，买楼系我最大目标，但慢慢储以备不时之需。（赚咗几多位数？）冇计，都唔知，因为我净系有入冇出，应该姑丈清楚啲。（有六位未？）应该冇啦！（买乜嘢奖励自己？）都冇，通常我啲钱都系食嘢，肚饿就食，乜都锺意食，我系睇口味，当日想食酸嘢就去食酸嘢。」现在有170cm高约51kg重的她希望维持磅数，但增高到175cm，因为除了做歌手也想当Model，「两样都想，但系想做歌手多啲，Model学嘅嘢都唔一样，同埋有时学咗Model啲嘢，可以套用番喺歌手度，譬如摆甫士。」

对于粉丝团「Gi炎粉」一直落力支持，Gigi非常感动，「真系要好多谢佢哋，佢哋真系会唔理天气都会过嚟支持，我真系好感动，唔系话喺金钱上付出就系对我支持，一啲心意，佢哋有时送啲手作礼物，譬如我哋比赛完一出到去好多fans喺出面等，佢哋捧住个好重嘅蛋糕，仲要系落住雨，我真系个心觉得好温暖，有时收到好多咭牌，我都储咗喺个盒度等得闲攞出嚟睇。」虽然人气高，但同样有不少负面声音，但小小年纪的Gigi抗压能力极高，「睇完一啲负面嘅评语后，我系会唔记得咗，但系当时嗰刻系会好唔开心，可能到第二日或者去完个厕所我就唔记得。我百毒不侵，但系如果外形或歌艺一定要拣一个会唔开心啲，我会拣歌艺，毕竟歌艺真系练咗有一段时间。因为一定有人靓过我，所以做番好自己最擅长嗰样嘢最重要。」

拣同Felix做对手戏

完成了人生第一个演唱会后，对于即将演出人生第一个电视剧，Gigi直言既兴奋又紧张，「始终都冇做过戏，之前我虽然有做过啲舞台剧，当时13岁，自己做个好怕丑嘅角色，但系睇番以前啲演技真系唔得，但系𠵱家应该都系咁，哈哈！（上堂学演戏？）都想，有机会都会迫自己睇多啲戏。（处理边类戏最难？）情绪大爆发，我自己情绪高昂嘅时候，可能得一下，所以爆嗰啲系超级难，爆喊或者歇斯底里会应付唔到，不过我都可以去学嘅。」由于今次剧集会集合15个参赛者演出，据知角色都是本色演出，但Gigi认为剧集难免有感情戏，问到想跟那个男参赛者演对手戏，她竟然搞笑话：「可能自己扮男人，应该OK！（一定要拣个参赛者？）Felix（林智乐），佢比较搞笑，可能会带动成套戏嘅气氛。」

讲到暑假后要升F.5，既要兼顾学业又要发展演艺工作，原来Gigi有想过暂时放弃学业，但好快已打消念头，「有谂过！但系我觉得𠵱家始终都系个学生，都想做番学生责任学嘢，增加自己内涵，其实要两边平衡，唔可以斋唱歌，始终要学多啲嘢，令到自己增加多啲经验同内涵。」不过她承认参赛期间确有影响学业成绩，「比赛完真系要追番学业上嘅嘢，比赛期间我嘅学业比其他同学真系落后咗好多，开学嘅时候要跟番啲进度。（考试成绩？）唔得，但系进步咗少少，有双位已经好开心，系升到班，唔系留班。」但她自爆参赛反而有助温习，仲搞笑趁机招募第二届《声梦》参赛者，「平时冇参加呢啲比赛，温书时觉得OK算啦！参加咗比赛唔可以畀人觉得唔理学业，好似反而温得多啲，快啲记入脑，会捉紧啲时间。（参加比赛原来系帮到温书㗎？）所以大家快啲嚟参赛。」