【独家】爱咗三十几年仍似热恋 黄智贤拖实老婆共享雪糕

53岁嘅黄智贤(Ben)最近忙拍邵氏新剧《廉政狙击》，剧中跟罗霖再续《真情》缘份演夫妻。开拍前，黄智贤就争取时间同画家老婆Maggie行街食雪糕，仲一齐去超市买餸。黄智贤系出名嘅「爱妻号」，佢曾经分享维系感情嘅秘诀，就系同步、同心，当日《头条日报》记者就亲眼见证到嘞。采访:谭壹致

TVB有好多「爱妻号」，唔逐个讲嘞，讲漏就唔好啦，不过黄智贤系呢份稿嘅主角，唔怕讲，一齐回吓带先，提到夫妻相处之道，Ben坦言夫妻一定会闹交，但会停一停，聆听老婆嘅想法：「只要大家有咁嘅心去夹，就可以排除万难。」佢又自爆不时送惊喜冧老婆：「佢好锺意花，我会定期喺屋企换花，事前唔同佢讲。我好在乎佢欣唔欣赏，就算系煮餐饭或插盆花，佢话锺意我就好开心。二人世界就系我取悦你、你取悦我。」完全系夫妻相处之道教科书嘅内容。

温馨家庭乐
好嘞讲返份稿，当日下昼，黄氏夫妇现身又一城，两人先去睇家品，乜都睇吓，明显冇特定嘢想买，行咗个圈买咗少少嘢就转去食雪糕，两公婆分甘同味，你一啖我一啖，食食吓男方就戴返口罩畀老婆食晒佢。然后两人去咗行超市买餸，拣菜都系黐住行，快买快畀钱就拖住手行去停车场攞车离开。