【独家】《逆天奇案》演警察沟女劲蠢黄智贤现实冧女有一手

2021-05-06 23:00

黄智贤（Ben）最近在TVB新剧《逆天奇案》中饰演重案组督察「Nic Sir」，虽然再演警察角色，但Ben不觉厌，因每次都有不同及有趣一面，好似今次的「Nic Sir」查案虽醒，但狂追蒋祖曼演的「律政界女神」却好鬼蠢。不过现实中，声称不懂制造浪漫的Ben，冧女确有一手，拍拖时无心之举足以令老婆记到而家。撰文：杜淑霞摄影：谭壹致发型：Hair Culture by Willie Chan 场地：台北·宽巷子@海港城

继《杂警奇兵》和《铁探》后再演警察角色，Ben仍未觉厌，「警察元素有好多种，可以有唔同character，同唔同岗位或者案件，好似《杂警奇兵》会地啲，但今次专做大案，可能同观众抽离一啲，但又可以畀到推理同悬疑部份。」

剧中跟蒋祖曼首次合作兼演情侣，Ben笑指对方与外表不符，「佢几好笑，cool cool地，玩落系个小妹妹咁，佢个角色系律政界嘅女神，表现好cool，我一见到佢，觉得佢好charm，好想追佢，但呢个阿Sir破案就叻，但追女仔就好蠢啦！哈哈！唔知点埋手，佢好又cool咁对我，变咗我要用啲计仔。（有戏院包场追佢？）但作为督察薪金有限，唔系富家子弟，唔可以真系包场，只可以包九宫格附近几个位，呢类情节几有趣几好笑，呢个傻佬做埋啲咁嘅嘢。」

现实中，Ben冧女就醒得多，当年仍是女朋友的太太Maggie，到现在依然觉得浪漫仲不时挂在口边，「我其实冇特别去谂一条桥，我冇咁有心计去相处，但记得有次打风落大雨定系豪雨嗰啲，啲街水浸，我唔想佢湿到脚，就孭佢踩住水行过去，点知一孭起佢，佢就系咁笑！唔知系咪觉得我好似傻佬咁，我当时只系想嗱嗱声过咗嗰个位，原来佢话未畀男人孭过喎！乜原来好特别嘅咩？我哋相处当中有啲咁样嘅片段，当时我只系想快啲解决个问题，原来佢系觉得好romantic，记咗咁多年。」