【独家】志伟刚揸权 两年拍四剧唔关老爷事 王敏奕对得住自己预有是非

娱乐圈出名是非多，靠人事关系上位，绝对是最佳材料俾人大讲特讲。早前曾志伟重返TVB担任副总经理兼行政委员会特别顾问，手执大权，最近在新剧《刑侦日记》担正的新抱仔王敏奕，近期又剧接剧，难免成为人话柄，敏奕亦有晒心理准备，但认为对得住自己就够，「人哋讲好难去避免，始终我哋有一个关系喺度。」不过她早前被何哲图睇中签约「星梦娱乐」做埋歌手，而有传何哲图跟曾志伟不和，她即搞笑趁机澄清工作方面好独立。29岁仲未想生B的敏奕，又指就算老公曾国祥也少有畀工作意见。撰文：杜淑霞 摄影：谭壹致 发型：Ken Hui @ii Alchemy 化妆：King Yip @KingsMakeUp 服装：Jonathan Liang @Lane Crawford 场地：Stain+

敏奕继《香港爱情故事》演大胆的「Shay」获好评后，最近在《刑侦日记》演职业冷门的法医人类学家「方菀芊」（Dr. Fong），跟黄智雯各自爱上多重人格的王浩信其中一个人格，最有趣两女不但冇竞争仲和平共处，挑战观众底线。她形容角色是个很简单女仔，「当佢了解个男仔有咁嘅状况，亦都冇问太多，冇话要争，反而同另一个女仔讲，不如一三五我叫佢出嚟，二四六你去同佢一齐。」


曾国祥所受压力更大


近期敏奕可谓剧接剧，继先后播出的《香港爱情故事》及《刑侦日记》，仲刚拍完的《把关者们》，以及刚开拍《旁观者》，而恰巧老爷曾志伟今年1月重返TVB做高层，难免令人联想到靠人事上位，她坦言有晒心理准备引发是非，「佢喺呢行咁犀利，好多嘢好难冇佢份，甚至乎我16岁人生第一套拍嘅电影《烈日当空》，佢都系监制，啲人都讲番转头，由嗰刻开始好难撇除一个关系，尤其是大家系屋企人，冇得唔关我事，变咗自己努力做好自己嘅嘢，亦都好彩就系《香港爱情故事》系播咗有一个认受性嘅，之后《刑侦日记》喺《香港爱情故事》拍之前已经同我倾咗，同一个监制搵我再拍《把关者们》，所有嘢起码我对得住自己，知道呢啲嘢系我努力成果，自己争取返嚟，自己做自己嘢就好足够，人哋要讲好难去避免，始终我哋有一个关系喺度，如果要咁讲点都讲到。」她坦承老公曾国祥所受压力更大，「佢更加系一个好好嘅例子，佢由细俾人讲到大，到𠵱家仲系有人讲㗎！」她笑言老公一句：「我都系咁啦！好少事！」已令她减压不少，「互相明白个压力，始终呢行有唔同角度俾人讲都好难避免，唔讲你呢样就讲你嗰样㗎啦！希望好嘅嘢俾人讲得多啲，盖过畀啲人抹杀你嘅嘢。」

何哲图睇中签「星梦」



提到早前签约「星梦娱乐」做歌手，敏奕坦言俾何哲图睇中都感受宠若惊，「咁啱佢同我老板好多年前系识嘅，佢就问起我音乐呢方面会唔会有兴趣？佢就提议做呢件事，过程入面我都好受宠若惊。」不过之前却有传何哲图跟老爷不和，而何哲图却跟她合作，敏奕即趁机笑着平反，「所以好明显，我嘅工作系好独立㗎啦！哈哈！尤其是我哋做呢行，预到一啲机会，衡量过程会同自己团队，未必考虑太多嘢，谂自己个人发展方面多啲，因为你自己几畀心机，几努力系得你自己知，所以好多嘢都系自己负责番自己嘅嘢。」她解释连老公曾国祥也少有问意见，「我觉得私人同工作分开番好啲，私底下大家希望有个舒服嘅相处同沟通，唔使有咁多嘢烦，同埋佢又系一个导演唔系management，佢冇办法用一个management嘅心态同角度，所以我好多时都系同公司倾多过同佢倾工作上嘅嘢。」



29岁仍想在事业再搏杀多一段时间的敏奕，跟讲求自由的曾国祥亦有共识未打算生B，「我哋呢行时间唔到自己话事，当你想控制时间畀番小朋友同家庭时，你就要放弃工作，同时间未必做到两样嘢，所以我都好佩服嗰啲又可以兼顾工作，又兼顾屋企嘅Working Mom，真系好犀利，我见到我啲朋友真系好佩服佢哋，我唔知自己可唔可以咁样，我会畀好多压力自己，我系工作同家庭分得好开，所以照顾小朋友我未必想工作。（仲有自己想拍嘅嘢？）起码自己唔会后悔未尽晒力拍自己想拍嘅嘢。」