【好有爱】两公婆离开TVB唔闭翳余咏珊变做小女人任何哲图扫背

2021-06-27 03:39

前星梦娱乐行政总裁何哲图（Herman）及前TVB助理总经理余咏珊（Sandy），因为TVB人事变动先后喺今年2月及4月离职，面对逆境，两公婆反而互相扶持，关系更加紧密。

据本报读者提供相片，见日前著住黑色长袖外套衬长裤，情侣装打扮嘅Herman及前Sandy拍住拖行日资百货超市，期间两人拍住上，有倾有讲，读者更发现Herman愈讲愈兴奋，施展传闻中对锺嘉欣嘅「扫把手」，上下咁扫Sandy个「肉」背。两人行经日式三文治及台式食店，心水清嘅Herman知道啱晒老婆口味，就上前柯打外卖，反观Sandy放低女强人本色，好似小鸟咁唔出声，默默企埋一边等老公去发挥，对老公表现，好似好满意咁样。两公婆买完外卖后，好合拍咁分开行，然后快步去停车场攞车闪人，就算失紧业但一啲都唔愁。

另外，又有读者日前目击余咏珊密会喺9月2日正式离职嘅TVB副总经理（节目及制作）杜之克，杜之克、余咏珊都系李宝安爱将，两人同声同气，当日两人约喺观塘一间餐厅内，选择坐喺靠近窗边角落，较少人嘅位置，读者目击当时两人鸡啄唔断，特别系杜之克似有好多委屈系咁爆，不过两人都高度戒备，只系细细声喺度倾密偈。