【独家】压力爆煲 花姐劝睇心理医生 AK失控喷涙：唔想认自己有病

做艺人难，做偶像更难！18年凭《全民造星》出道爆红的MIRROR，短短两年多万千宠爱的同时，亦承受非一般压力。成员Anson Kong（江𤒹生）去年开始出solo歌，虽然成绩不俗，但最终年尾颁奬礼未能夺得恨攞多时的《叱咤》生力军奖，失望之下木无表情的AK，被外界指黑面冇风度狂插。早前他推出新歌《黑之呼吸》接受《头条》访问，重提事件突然压力爆煲流下男儿泪，他承认怕家人担心而情绪低落，试过锁自己在厕所几个钟，花姐曾劝他睇心理医生，但他不想承认自己有病，亦想专心应付演唱会等排山倒海工作。不过他承诺会以健康的Anson走落好，希望可以快啲见番活泼开朗的AK啦！撰文：杜淑霞 摄影：谭壹致 造型：PIPA Creative 发型：Denny Ku@Chic Private i salon 化妆：Rainbow [email protected] makeup centre 服装：Maison Margiela 、Giuseppe Zanott 场地：VS MEDIA

AK坦承创作新歌《黑之呼吸》，确实跟叱咤颁奬礼当晚事件有关，「嗰日我有做得唔好地方，我冇去首先恭喜我队友，太过沉醉喺自己个黑色世界入面，呢个系我需要改善嘅地方，《黑之呼吸》有讲到呢件事，如何去处理自己嘅情绪，就系唔好伤害到别人先，我觉得我冇伤害到两个兄弟，反而我伤害咗自己啫！呢个系我喺呢个颁奖礼上咗好大嘅一课，对我点样面对自己情绪。」



提到对《叱咤》的情意结，AK竟然讲到喊，「我哋11月出道，隔咗两个月开演唱会跟住上《叱咤》，我好记得去完《叱咤》会有个会章同埋场刊，我哋第一次去只系喺个台度行出嚟，唔叫参与过，但大家好开心，自己都有份，我仲好记得返到屋企落妆未冲凉，坐喺厕所望住个章望咗10几分钟，终于去到啦！（喊）等咗咁多年终于去到，嗰阵时好开心。」原来AK并非单为个人荣誉，他眼湿湿话：「我好想为屋企人攞一次奖，觉得上年系最有机会，比起《全民造星》好似更加大机会，对自己期望好大，当冇嘅时候失落会好大，我嗰阵时个脑净系谂住阿爸阿妈，我冇因为嗰啲舆论唔开心，反而去反省自己，内心好想为屋企人攞啲honour，原来我嗰日做嘅反应，反而伤害到我嘅屋企人，因为我啲屋企人会好担心我。」

唔识消化情绪


AK认为新人奬一世人只得一次，对奖项的渴望和野心，一直是他进步的原动力，因自知天份不及其他人，更承认过程给了自己不少压力，「做得未够好，点样可以做得再好啲，一路形成呢种压力，内心有呢啲情绪，唔知道点样消化，特别入行后，呢一行忽然间唔系好容许艺人有情绪抒发，（眼湿湿）艺人就应该系廿四小时都positive，好攰㗎喎！艺人都会有收工时候，我哋出个post，打嘅嘢唔开心少少又会影响到好多人，开始会慢慢收埋自己情绪，有啲唔好嘅情绪都唔敢同人讲，唔敢同屋企人讲，最down嘅时候开始负面，又知道自己唔可以咁样喎！开始搵其他嘢去做，疯狂咁样练嘢，但练嘢知道好多嘢唔够，又畀咗好多压力自己，呢个系一个好差嘅循环嚟。」


AK的情绪问题连花姐也替他担心，「上年年尾到今年年头，花姐都有叫我睇医生，因为有段时间我唔敢面对屋企人，成日坐喺厕所度坐几个钟唔敢出嚟，我同花姐讲呢件事，佢话应该要去睇吓医生。（有冇睇？）暂时未，因为我唔想承认自己系有病，我觉得可以解决得到，又准备开骚比较忙，冇乜时间去处理呢啲嘢，我OK嘅，我会以一个健康嘅Anson走落去。上年系学习点样去释放自己压力好重要一年，其实经历过1月1号同埋呢几个月之后，我自己系好咗嘅，亦都搵到个方法去令自己舒服啲，唔好畀咁大压力自己。」