【独家】吴海昕难忘追着电车夜跑胡子彤强尼跑马拉松虚脱险晕

2021-04-15 19:13

胡子彤、吴海昕、强尼首度合作电影《二次人生》，戏中三人在地产公司工作，强尼是子彤和海昕上司，而子彤是个由细到大冇目标的人，仲要运动唔叻，同他刚好相反，最初演绎时好唔惯。讲到难忘戏份，子彤和强尼都好记得跑马拉松一幕，子彤差点跑到虚脱，而不用跑只打气的强尼亦搞到见晕；而海昕就最深刻零晨时份追着电车夜跑戏份。撰文：杜淑霞摄影：谭壹致发型：Nick@Orient4(子彤)、Zap Tang@Essensuals Toni&Guy(海昕) 化妆：Bonbon@MOD Makeup Academy(子彤)、Onki Lau(海昕) 服装：ATSURO TAYAMA (海昕)、HARRISON WONG(强尼)

戏中主角「李志行」由细到大都冇目标，跟现实中的子彤刚好相反，「我系唔可以冇目标，『李志行』畀我尝试一个冇目标嘅人生，不过当你有层楼，食得住得瞓得，有friend陪吹吓水，有条女沟吓，几开心呀！咁等如人生乜都冇，当你冇嘅时候想有啲嘢，先会有目标，估唔到可以经历个咁嘅人生，廿几年有目标嗰啲嘢掉低晒，试吓冇目标系点，任由导演决定点样行，都几好玩。」

戏中子彤有不少跑马拉松戏份，但导演何力恒要他扮唔识跑，「我平时有跑，细个系玩跑步先。套戏有好多跑开嘅人帮手拍，我就同佢哋极端相反。（吴：hea跑！）系hea跑，又唔系困难嘅，用另一个方法处理啫！」讲到跑马拉松，结局一场子彤跑足整日差点捱唔住，「拍完之后我同强尼讲，我真系有啲虚脱有啲攰，而戏里面强尼喺侧边叫我跑埋佢，我真系捱埋，个画面系好深刻。」原来这场戏虽然强尼唔使跑，但都因体力不足好难忘，「冲线嗰段喺天光道拍，我印象都深，因为嗰度一条直路，我要不停咁嗌，我就嗌到喉沙兼喉咙痛，又唔可以悭力，嗌咗好多take，嗌到有啲晕晕哋，证明我唔够fit呀！」至于海昕最难忘零晨追住电车夜跑一幕，「我哋跑咗一晚，拍到零晨三、四点，同一班真系跑开西环嘅跑友一齐拍，我拍之前有专登练跑同埋踩单车，所以我嗰晚都可以跟到，但系跑完之后都有同子彤讲不如操吓体力，嗰班人真系好fit，嗰晚系好开心，因为一路有得做运动，跟住又可以拍戏，好难得可以跟住架电车跑。」