囝囝满月影全家福 原子鏸赞老公好爸爸帮手凑B

满月快乐！原子鏸（Marsha）上月为摩洛哥籍老公Mehdi El Ajimi诞下混血萌B Matys El Ajimi，正式晋升人母。适逢囝囝满月，Marsha一家三口带同爱犬影全家福，期间Matys不时对著镜头放电，融化全场女心，就连Marsha也被囝囝冧爆：「虽然瞓得唔系几好，但每一次望到佢，我就觉得一切都好值得，因为佢真系好得意。」
初为人母一个月，「新手妈妈」Marsha自言不觉辛苦，并透露现时哺喂母乳：「对我嚟讲系一份好美丽嘅回忆，因为可以同BB更加亲密，呢种感觉真系难以言喻，只有做人妈妈，先会有呢份体验，不过BB依家成日肚饿，所以都有啲难凑。」为了让Marsha适时休息，老公主动举手轮更，令她好不感动：「佢帮咗我好多，大概每晚9点到凌晨2点就会轮更，帮手喂奶、换片、抱住BB𠱁佢瞓觉，佢真系一个好好嘅爸爸。」

郑佩佩虽然身在美国未能回港探孙，但也会通过视像通话，隔空「抱孙」、为女儿打气；问到妈咪有否传授育儿秘笈？Marsha笑言：「妈咪冇乜教我，因为佢已经唔记得晒！」
疫症肆虐，Marsha仍未决定会否为儿子搞百日宴，她寄望疫情早日结束，届时一家人到老公家乡摩洛哥大事庆祝：「呢个系佢哋嘅习俗，新生BB第一次返摩洛哥，会举行一个盛大嘅庆祝活动，类似香港嘅百日宴。」