【独家】唔舍得《流行经典》 薛家燕赞同节目见好就收畀多啲机会新一代歌手
2021-03-16 16:28 
曾志伟上任无綫副总经理掌管综艺及音乐，搵埋何丽全出任「星梦娱乐」行政总裁，仲开绿灯畀3大唱片公司歌手重返宣传新歌，𠵱家TVB成个综艺玩法唔同晒。由薛家燕主持嘅《流行经典50年》被全新面貎嘅《劲歌金曲》取代，革新后嘅《劲歌》安排喺四月，周日晚上9点半播出，正面硬撼ViuTV音乐节目《Chill Club》。3月30日家燕姐71岁生日当晚录影最后一集，个半小时加长版嘅《流行经典》后便正式告别。
今午家燕姐如常入电视城为晚上录影彩排，她带点依依不舍神绪接受本报访问说：「个节目都做咗近4年，一直都好受欢迎，不过，其实每次请嘉宾及拣歌都几难，几头痛㗎！𠵱家总算系告一段落，见好就收系好事。之前喺节目度，好畀面请返一啲歌手，复出上嚟开心吓，亦有啲歌手因为呢个节目红咗上嚟，呢啲都系开心事。咁当然系唔舍得嘅，但天下无不散之筵席，他朝可能又再相逢，都多谢大家啦…今日下午彩排时突然有人话『万岁』请食嘢，仲有一日就完成，我谂最后一集大家当聚吓，会隆重啲，请多啲嘉宾上嚟玩。」
她明白公司改革用意：「新计划畀多啲机会新一代歌手全面演出系好事嚟，呢啲都系我哋期待嘅嘢，咁样乐坛先会再度蓬勃罗！咁样大家都开心㗎！」
關鍵字
最新回应