【独家】被指攀附上流强调自己亦富贵 冯盈盈开放式约仔日走三场

26岁嘅冯盈盈(FYY)被爆蜜会「新欢」，原来系大鸿辉兴业地产执行董事曹展康（Bobby），Bobby仲有个身家约351亿港元嘅「铺王」姐夫梁绍鸿。盈盈坦言对方系朋友纯粹请教投资心得。日前盈盈风骚入厂录影贺年节目《天天开运王》，期间手机不离手，不断收发短讯，对被指攀附上流社会，盈盈冇你咁好气，坦言：「唔通摺埋喺屋企会学到嘢咩！」她更自爆会擅用时间，最劲一日走3场(约会)！采访：方骞平 摄影：谭壹致、张咏森

入行仅4年嘅冯盈盈火速「升呢」做姐仔，除咗拍剧，近期大show《冲上云霄大选》、《慈善星辉仁济夜》等都有佢份，而今年《天天开运王》便跟薛家燕、林盛斌、区永权及张秀文做主持。盈盈好识做会主动帮阿Bob抹吓额头唔均匀嘅粉底，呢个姐仔好识𠱁人！

陈定帮叫盈盈见多啲人

有名你叫「新闻女王」，冯盈盈继去年富二代船P罗生门事件跟江嘉敏擘面后，又被指贪慕虚荣过着奢华生活，住海景豪宅、用20万限量版名牌包包、结交有钱仔、揸靓车出入、请埋小助手、埋胡美贻阔少男友Reeve堆等，最近还指她有「新欢」后狠撇「大只兵仔」郑衍峰(Leonard)，传闻一浪接一浪。录影完节目，盈盈即追问陈定帮师傅点样化解是非？师傅安抚盈盈叫佢定啲嚟：「你命格系会招人妒忌，会畀人讲吓你，但呢个系好现象，愈多人讲你会愈出名，迟啲会飞上一线，有排玩，根本唔使靠人。今年超多男女贵人，全部贵人星都系锺意你，先会嚟帮你，应该多啲见吓朋友。」得到师傅加持，盈盈自言会去到尽！

觉得脱节要增强社交圈

FYY坦承经朋友介绍认识执董Bobby：「纯粹只系食饭，普通朋友社交活动，大家大惊小怪啫，我又唔会自负话对方系追求者！」被指攀上流，她霸气否定：「我自己都好有钱呀，唔使将钱同我联埋一齐。𠵱家我照顾到自己同家人，过到自己锺意嘅生活，锺意食乜餐厅，买乜心头好，唔使靠人。」她坚持识朋友唔使做资产审查，思想上有交流，令她长知识更重要：「呢几年喺娱乐圈，发觉同社会有啲脱咗节，要靠出面人，否则倾嚟倾去都系电视城入面嘅节目、剧集，个人就会思想狭窄，趁年轻仲系单身，同朋友出去食个饭，真系冇乜问题喎，唔通摺埋喺屋企会学到嘢咩！」她又表示正进修一个加州柏克莱大学关于情绪辅导的心理学online课程，提升内在修养，读后发现，桃花及是非都唔及心态上困扰大，只要用冷静态度嚟处理就会赢。