【独家】拖老婆叹海鲜过情人节 黎耀祥撑志伟任TVB高层系好事

一向在TVB「无党无派」，凭演技打稳江山成为三届视帝的黎耀祥，去年虽然挑战4届视帝纪录失败，不敌「TVB亲生仔」王浩信，但祥仔看透世情零失望，更力撑视帝王浩信及视后蔡思贝，著两人不要介怀是非：「咪畀人讲吓罗，又唔痕又唔痛。」过往都会去美国登台搵钱顺便过农历新年的祥仔今年只能留港，祥仔坦言最紧要亲人喺身边，边度过新年都冇所谓。采访：方骞平 摄影、谭壹致 场地：龙袍酒家@湾仔新鸿基中心2楼

疫情下留港过年的祥仔，情人节撇甩阿仔带老婆梁耀莲（Julia）去食最爱的龙虾伊面，仲有笼仔蒸象拔蚌及金萡滑年糕等，祥仔系暖男老公，先夹餸畀老婆，才轮到自己食。当日两人由名厨「帜哥」黄永帜亲自招呼。祥仔都算系半个大厨，初二嘅开年饭由他炮制，阿仔黎正桥最Like。


疫情下有工开

回顾过去一年，祥仔非常满意：「因为肥妈个护照出咗问题，所以去年农历新年嘅拉斯维加斯Show由我嚟顶，唱完疫情就大爆发，好好彩赚到水尾，年中喺香港拍咗内地楼盘广告，年尾又拍咗剧集《拳王》同做清谈节目《双祥见》，喺疫情下工作叫有交待。」问到最美中不足系咪未能再度封帝？他语带轻松说：「又咁讲啦，攞过3次经已好满足，好巴闭，再攞第4次当然要继续努力，但已唔系目标，其实演员只要攞到观众认同及肯定已叫合格，合格后点样再冲上去，真系要好多天时地利人和配合，加上观众口味，甚至政策方向，颁奖礼如行业上嘅推广，成个行业蓬勃，大家有得捞搵到食，我攞唔攞到唔系咁重要。」

人人都想八卦

提到视帝王浩信及视后蔡思贝夺奖后备受争议，后者更被质疑获广告老板绯闻男友撑腰下夺奖。而陈自瑶对王浩信得奖后多谢她的反应又被网民封做「最佳女主角」，对此祥仔忍不住笑：「冇办法啦，陈自瑶嗰个焦点突然间出咗嚟，大家都估唔到嘅，反而帮到台庆颁奖礼上咗热搜第1位。其实呢行系俾大家茶馀饭后用嚟高兴吓，赞又好弹又好，过多一头半个月就冇人理啦，大家都系想八卦啫，咪畀人讲吓罗，又唔痕又唔痛，都系咁生活。」

吁包容新一代

祥仔又指蔡思贝未致于冇资格获视后：「TVB真系青黄不接，处于时代交替状态，咁同以前个个做咗10几20年嘅艺人比较，新一代梗系个个都唔够秤啦，但呢个年代系一定会转变，好处反而系年青化咗，大家畀多啲包容后生一辈啦。」祥仔亦强调点都唔信一个金饰广告会帮到蔡思贝攞视后，「TVB有咁多大客户，听得边个讲呀？咁当年同样有金饰广告嘅林峯，唔通年年攞视帝咩？」由于祥仔向来冇后台，曾志伟上任TVB高层对佢冇乜影响：「佢哋系叻人嚟，多啲集师广益都系好，多啲唔同谂法对TVB都系好事。」