【独家】返加拿大前约老友见吓 李施嬅同赵希洛超市扫零食

因为剧集《Blood and Water》第三季复工，39岁李施嬅月初返加拿大隔离兼继续拍摄。临远行前就约好姊妹，38岁的赵希洛行超市争取见面时间，两位中女主力睇零食，两个都咁瘦，大把Quota啦。采访:梁志明

李施嬅份人都几老实，之前因为要返加拿大，所以缺席无綫颁奖礼，有粉丝喺佢IG留言：「今年有可能攞奖，会唔会有代领奖？」李施嬅当时已回覆：「儍瓜，唔出席就冇可能有奖㗎啦！」睇得透仲要够胆讲，另眼相看喎。

全程睇零食
出发去加拿大前，李施嬅就约老友赵希洛去超市行吓。当晚约七点，两人现身铜锣湾时代广场地库，赵希洛对展销场中有按摩功能，可帮助舒压及减少发丝断裂的魔力功能发梳好有兴趣，见佢睇咗好耐，再经Sales介绍，120蚊一个，谂一阵就入手，之后入超市会合李施嬅，两女分开睇，但睇嘅都系For牙痕过瘾用，两人随意兜咗个圈，买咗啲零食，如黑松露迷你饼乾条，然后就排队畀钱再一齐行去停车场攞车返归。