【独家】首度客串演剧集《使徒行者3》泰臣师弟罗云龙恨拍动作戏

2020-12-24 10:00

泰臣师弟罗云龙一向以玄学工作为主，但最近首次客串演出剧集《使徒行者3》，剧中他饰演Ｏ记高级警司、关宝慧的下属，以往多数上节目做嘉宾的他，首次有角色讲对白，虽然只得几句，但已令他惊餐死，幸好最后都顺利过关。曾任职海关17年的他，再着纪律部队制服驾轻就熟；而本身跟邵氏电影很有渊缘的他，未来更希望有机会拍动作戏。采访：杜淑霞

阿龙坦言首次拍剧感觉好陌生，特别担心讲对白，「初头知道要演戏，第一个反应系『系咪真㗎？！』都有即刻请监制苏万聪唔好畀咁多对白我，唔系惊大家收唔到工，哈哈！以往上电视节目都系做访问形式嘅嘢，有主持人问我再去答，讲嘅系专长嘅玄学，今次要讲对白真系唔习惯，但系几得意几好玩嘅。」

剧中阿龙演高级警司，他坦言以往曾任职海关17年，不时要着制服的他，对今次角色要着军装都有帮助，「我做海关时头9年系做领犬员，跟住喺毒品调查科做咗5、6年度，最后喺毒品调查科做便衣，做跟踪同拘捕工作，所以最初都成日要着制服，今次拍摄要着警司制服，都帮到吓手识得点样着。」

望推出英文玄学书

有过这次拍剧经验，阿龙有机会都想再尝试，更希望有机会拍摄动作片，原来除了跟他学过跆拳道和太极之外，还跟他的成长背景有关，「我系有啲情意结，因为我第一份工喺邵氏（电影）做冲印菲林，而我阿爸同阿妈都喺邵氏认识，阿爸以前喺邵氏做剧务，阿妈就系做替身嘅，帮女演员施思替背，嗰时我成日喺片场睇人拍动作片，最记得休息时何家劲过嚟教我摺纸飞机，嗰啲画面我仲记得，所以好想拍动作片，同埋我记动作应该易过记过对白，哈哈！」

至于玄学工作方面，阿龙除了希望拥有自己的玄学节目外，最想可以将玄学推广到外国，「玄学唔系迷信其实系一种科学嚟，系中国嘅古文明，全部嘢都有根据，其实外国人都唔抗拒，所以我好想出英文玄学书，等多啲外国人可以睇到，同埋外国人对玄学冇乜认识仲容易接受，不过自己英文唔系太叻，真系要搵人帮手，因为翻译起嚟真系唔容易，相信如果真系做到，对成个行业都会有帮助，我会朝住呢个目标去做。」