【独家】下年50岁仍未更年期 江美仪疯狂跑步成全马选手

虽然江美仪喺TVB新剧《使徒行者3》中只做串星，但同苗侨伟嘅悲剧收场，病重离世嗰幕令不少观众流晒眼泪。近年改签TVB一年一剧嘅江美仪本打算外闯，无奈疫情下打乱计划，但正好多咗时间增值同做运动，爱上跑步后，美仪嘅新陈代谢好咗，明年「入五」的她仲自爆仍未到更年期。采访：方骞平 场地：贝尔特新蒲岗九龙酒店

继《杀手》后，江美仪于《使徒行者3》演出同样引人入胜，美仪演出时一样难舍三哥：「埋位时我第一时间叫三哥除衫，将外衣披喺我肩膊度。三哥就建议播埋洗脑歌《愈难愈爱》，导演睇playback喊到眼红红。」

要交功课畀发哥
由于疫情下少咗工作，江美仪有更多时间陪伴家人，仲搵老师执正返啲普通话、学日文及做运动，好有正能量：「近年一有时间就去跑步，今年5月本来报名去日本跑马拉松，可惜取消咗，惟有留喺香港参加线上半马马拉松，再喺7日内累计跑咗共44.4公里，将有关纪录登记返成为富士山马拉松全马选手，都好有满足感。」因为限聚令影响，美仪表示好耐冇同发哥跑步，但佢无偷懒。「都有交『功课』话佢知状况，佢好留意跑友动态，都知我报名参加马拉松，佢有提醒我要注意跑姿，但都扭亲，可能着错跑鞋。」

因为应付跑马拉松，美仪体重得返100磅，她更影响埋唐诗咏跑步，诗咏仲拉埋黄翠如落水：「诗咏自从跑步后冇咗水肿，上镜sharp啲，其实大家都想身体健康啫。呢年我出汗排毒，加上夏天Keep住用冻水冲凉，又冇开冷气，皮肤都冇咁乾。」至于系咪延后咗更年期？她笑住自爆：「我仲需要用(M巾)。我成个线条唔同晒，连patpat都挺啲，睇返三年前拍《夸世代》，当时块面好圆，𠵱家呢个状态，啱嘅人应该好快会出现。」