【独家】羡慕Ian有肌 撼赢Eason入围「最喜爱」五强 姜涛吓亲坦言未够班

「姜糖」等足4个月，亲爱嘅姜涛终于完成台湾偶像剧《超感应学园》拍摄回归嘞！「姜糖」趁他返港即送大礼，成功推他入围叱咤「我最喜爱男歌手」最后五强，可惜即惹来是非，指他将Eason陈奕迅和哥哥张国荣踢出局，姜B宣传新歌《爱情签证申请》趁机同《头条》呻，完全唔够胆同前辈比较，仲话自己根本未够班，更讲明fans之后唔会再推他夺奖。而台湾之行肥咗8 kg嘅姜B，自称在花姐严格监控下成功搣甩肥肉，对自己身形唔多满意的他，直言劲羡慕Ian@MIRROR在剧集《男排女将》晒肌演出，希望身材终有fit爆一日。撰文：杜淑霞 摄影：李维隆 发型：Lydia Yung &Denny Ku@Chic Private I Salon 化妆：Circle Chong &Tifa Annie G Chan makeup centre 服装：Y’s 场地：FWD HOUSE 1881

姜B今次推出新歌《爱情签证申请》，讲偶像身份好难拍拖谈恋爱，明显是自身写照，佢仲话自己好恨拍拖，「其实点解唔恨呀！？讲真我呢个年纪嘅男仔，有边个唔恨拍拖，对于爱情都有一定嘅冲动，但系冇办法，入得呢行就好多时候要谂清楚，冲动还冲动，唔可以做傻事。（咩傻事先？）讲真拍一段拖未必可以负责。（对个女仔？）都系，对所有人都系，你要畀所有人一个交代。但系我唔会埋怨，因为我知道做呢行就系咁，所以想透过呢只歌，讲吓我哋心声。」


《爱情》MV姜B搵来同剧拍档，台湾正妹林思廷（Tammy）任女主角，不过反而令他醋意大发，因姜妈睇完MV就当正Tammy系未来新抱，「佢系我阿妈嘅理想型，哈哈！我一返到香港，阿妈第一句唔系问我喺台湾生活点，佢系问Tammy好好！因为佢本身好希望我喺台湾搵女朋友，佢惊我万一喺香港拍拖唔方便，如果喺台湾拍拖方便好多。我嗰下有少少不爽，我阿妈竟然关心人哋，多过关心个仔。」

留台激增8kg


姜妈唔锡，「姜糖」锡番啦！姜B甫回港即有好消息，入围叱咤「我最喜爱男歌手」最后五强，他觉得好大鼓舞，「系一个好大嘅肯定，代表你做嘅作品，你做嘅嘢有人支持，有人投票你先入到，当然另一方面知道自己入围唔完全因为作品，好到全香港人都锺意。」所以他坦承未有信心攞奖，「暂时自己无论系歌唱实力，歌曲令大众认识嘅程度都唔够多，所以你颁呢个奖俾我，我都真系唔敢攞，我都知并唔系咁有资格去攞，我fans都同我讲，佢哋投我都系为咗入五强，佢哋都唔够胆投真系嘅最喜爱，我啲fans都好懂事，佢哋话你入五强当赢咗。」对于被指踢走Eason同哥哥，他亦感到好无奈，「哥哥同Eason呢啲已经系另一个level，系我哋所有后辈以佢哋为目标，其实都冇话踢唔踢，因为我哋都已经视佢哋为偶像，点够胆话踢佢哋出去。讲真你攞我同Eason比，攞我同哥哥比，呢啲根本就冇得比较，因为唔同嘅时代音乐都唔同咗，佢哋永远都系值得尊敬嘅前辈。」


一向受体重及身形困扰的姜B，原来趁住返港隔离期间亦做了不少体重管理，因为留台时激增达8kg，连平日唔觉肥的面仔都胀埋，「个排系肥到块面都觉，花姐认真严厉同我讲，返嚟隔离呢一排，减唔到唔好出嚟。」经过节食同运动双管齐下，总算回复正常，不过他仲未满意，「仲有努力空间，我都希望好似Ian（陈卓贤）个剧（指《男排女将》）个身材咁样。（试过咁嘅身材未？）梗系未！（系你梦想身材？）系梦想嘅身材！（下年其中一个目标？）下年呢个未入计划住，哈哈！若干年后，希望自己可以有呢一日。」