【独家】放低老友钱国伟离世伤痛 郑伊健 任贤齐有戏拍片场好High

疫情缓和，由范振锋监制，郑伊健、任贤齐（小齐）、潘灿良、谈善言及张达明等主演，将安排贺岁档上映嘅温馨励志电影《大Project》马上赶工。等咗成年终于有工开，就连好友钱国伟刚逝世嘅郑伊健都难得有笑容，开心同谈善言对戏，而小齐就喺片场度表演企起身揸电单车，现场弥漫一片欢愉。采访：方骞平 摄影：李维隆

电影故事来自新导演沈锡然的亲身经历，伊健、小齐饰演由细玩到大嘅好朋友，两人合作开洗碗工场，聘请弱势人士，但又从中瞒骗政府社会福利补助，最后当然改邪归正，笑中有泪。伊健自三年前拍完《黄金兄弟》后已再冇开戏，他表示好挂住开工饭盒！小齐同相熟剧组并肩作战就相当兴奋，日前两人拍洗碗工场景，小齐着住T-shirt短裤配白色水靴，同「南亚裔四大天王」驾驶电单车，跑住去送货；伊健就同谈善言拍表错情嘅暧昧文戏。

放低故友伤感寄情工作

老友钱国伟上月底不敌癌魔「走先」，伊健虽然心情低落，但当日伊健情绪平伏番唔少，心情唔错，主动跟导演及谈善言对戏及排走位，笑晒口提供咗唔少意见，相当专业。伊健仲贴心地为本报构思独家相位，跟小齐骑住电单车，同「南亚裔四大天王」演员嚟个有型合照，伊健礼让地跟小齐说：「我坐架细，你坐部大喇！」小齐即话：「冇所谓！」伊健零架子，影完相后还礼貌对住大家说：「唔该晒咁多位手足！」跟住用乌都语(巴基斯坦话)跟「南亚裔四大天王」讲：「shukriya(谢谢)。」有工开，有精神寄托，伊健成个人生猛晒。

自爆食店执笠惨痛经历

小齐超爱揸车，片中要他揸电单车送货，小齐寓工作于娱乐，开车前兴奋到扭身扭势，乘机仲踩多两个圈，临尾加演企起身开车、坐喺度伸起双脚揸车嚟自娱。片中小齐系洗碗工场老板，加上有洗碗机，唔使落手落脚做洗碗，但自爆有日坏机要用手洗，仲要拍足一日，洗到双手皱晒皮。对于做洗碗工，小齐一啲都唔陌生，自爆有个惨痛经历：「大学时喺餐厅洗过碗，我锺意食嘢，97年前开咗间泰国餐厅，生意好时都要帮手，由堂前、侍应、厨房做到洗碗碟工，好辛苦，做洗碗工好重覆，单调啲，做到嘅人真系唔容易。」小齐话当年洗碗洗得好落力，「洗得唔乾净会影响生意，嗰时未系好红，当系副业，谂住有嘢做都几开心呀，但后嚟红咗冇时间打理，结果执笠。」

小齐强调之后冇再开食肆，因为佢太好客，「所有朋友去食嘢都搵我，由我埋单所以赚唔到钱，每个月会计都打畀我话要补钱填数，经此一役，启发到我做生意同交朋友要分开。𠵱家作为大岳娱乐老板庆幸有钱赚，我会同艺人讲明，投资一个演唱会未必即时赚到钱，但要做好口碑，将个人提升，艺术同经营生意要取到一个平衡，但我会先选择艺术行先，要留畀人有刻骨铭心嘅作品。」