【独家】曾经户口剩两位数问阿妈攞钱 E-kids@Alan为追梦「高龄」挑战《造星III》

《全民造星III》正热播中，以40岁「高龄」成为年纪最大参赛者嘅E-kids成员林咏伦(Alan)，入行18年要重头嚟过，但就愈战愈勇：「冇喺幕前咁耐，体力、记性冇佢哋(年轻参赛者)咁好，面对同期出道导师林二汶，要放低明星包袱，仲要戒除80年代嘅过气舞步，学会同观众沟通。」虽然压力唔少，但成功召唤出道时嗰团火，Alan坦言已经赚咗。采访：方骞平

《造星III》首播当晚，自嘲系耆英组嘅林咏伦同一班参赛者食海鲜睇首播，好鬼Friend：「睇完第一集觉得自己唔够准备去参赛，肥肿难分，睇到有啲尴尬，好多人都话我第一集同𠵱家身形争好远，亦都睇到我不断有进步。」虽然Alan目标能入到10强，但都不时提醒自己唔好将比赛睇得咁重，否则会好辛苦：「呢个Show唔系比赛咁简单，系个几折磨嘅真人骚，要Keep住心态唔可以放弃，否则好难玩落去。」

Alan多谢导师出心出力帮参赛者，更发现原来入行多年都仲有好多进步空间，「导师都会鼓励我话：『畀啲信心自己啦，好多参赛者会问你意见，你都会影响到人㗎。』其实由E-kids开始一直好冇自信，觉得自己好废。08年E-kids解散去咗开酒吧，点知入不敷支，户口得返两位数字，好丑怪咁摊大手板问妈咪攞钱，自己又读唔到书，做嘢三分锺热度，惟一系锺意唱歌，𠵱家觉得自己好有营养，乜信心都返晒嚟！」Alan最开心识到一班后生仔，「有时脑闭塞，跳舞Step唔记得，我就会请教佢哋，练练吓变咗一班人一齐练，佢哋叫我伦伯、伦爷、烂gag人，有次拍MV拍到清早六点几，几十人叫我：『伦伯呀！可唔可以整个笑话嚟笑吓，好攰呀！』我就话：『哈！当我小丑呀！』」参赛后都不少负面声音，「当然好多人话我：『40岁人做返40岁人嘅嘢，正正经经唔好发梦啦！咁老就唔好同人争呀？』其实我唔系同人争，只系想话畀人听，我仲喺度坚持紧呢个梦想，所以我会好珍惜参赛每分每秒。」