【头条独家】停巡演收入大减 布志纶登记做Uber司机

虽然疫情渐趋缓和，但香港气氛仍然唔好，所以乐队Mr.主音布志纶（Alan）推出新歌《喘一口气》：「做音乐可以舒缓大家情绪，既然喺迷失时候，大家都想寻求新方向，但又搵唔到，倒不如当自己系羽毛，尝试飘去拍MV嘅布拉格，感受现实以外嘅嘢，咁样会relax啲。」采访：方骞平 发型：Terry Yeung @ Hair Corner K11 场地：Amelia @ Harbour City

由疫情爆发至今，布志纶相信大家都唔开心，希望香港人能够藉住他的新作暂忘四分钟现实：「呢个时候派歌唔会有商业上得益，但大家都要娱乐，自己唯有做得几多得几多，如果大家听完首歌系会舒服咗嘅，咁我咪成功罗。」

人生苦短要珍惜
Alan又指《喘一口气》因曲风同路向跟MR.的歌好唔同而惹来奇怪负评：「有乐评话我脱离咗MR.摇滚光环，做呢啲歌冇乜特色同个人风格，其实MR. 嘅歌我唱咗10年，先想试吓搵唔同嘅嘢，我喺音乐圈打滚咗11年，明白冇可能讨好全世界，只会享受制作音乐过程！」Alan强调人生好短暂，疫情由一个地方去到全世界，好多人失去生命，既然有谂法又有时间就做咗佢，「唔好浪费自己光阴，唔系一定要有伟大理想，讲真做音乐有几伟大？呢个圈令我急速成长，以前Mr.五个傻仔乜都唔识，每步都系学习，睇返MIRROR，感觉好似当年MR.，盲桩桩去冲，呢团火系好睇嘅。」

最后Alan强调自己入行多年，要燃起另一团火，「好似威士忌咁，年份唔同有唔同味道。」另外，MR.今年的巡演已取消：「好惨失晒预算，生活难过，为咗养妻活儿，我经已登记咗揸uber，所以大家见司机系我个名，唔好问点解，有几奇啫，冇放唔低身段呢回事。」