万圣节日韩艺人扮嘢最出色水原希子变巨乳仙子超惊艳

2020-11-01 19:45

昨日是万圣节，即使世界各地疫情仍未明朗，但无损一众艺人扮鬼扮马庆祝嘅心。扮动漫角色又有，传统啲扮吓吸血鬼同南瓜又有，不过最爆都应该系日本名模水原希子，超级前卫嘅仙子造型，加上离奇升Cup，成个人变咗葫芦身形，巨乳仙子Look真系睇唔惯。

水原希子
水原希子扮仙子，听落冇咩特别，细心一睇浅蓝色假发加上两条长触须，造型其实好破格。她更走上涩谷街头影相，成件事够晒Cyberpunk之馀仲好有未来感。平时瘦到得棚骨的Kiko，上围更连升好几Cup，真系唔知系点样僭建出嚟。希子好认真有相又有片，片中咬埋手指，意态非常撩人。

陈家乐
上星期已收到卫诗雅Challenge的陈家乐，昨晚找数扮演动漫《鬼灭之刃》男主角「炭治郎」，但发型就畀大家强烈耻笑，关智斌更指「好想帮你梳头」。

关智斌
同样收到Challenge的关智斌则扮成《鬼灭之刃》「富冈义勇」一角，他表示本身公司准备了另一角色「伊之助」的服装，可惜「伊之助」上身要打大赤膊，Kenny又自称食肥咗，令大家无缘饱眼福。

何佩瑜
何佩瑜（Jeana）同4位朋友打扮成《美少女战士》的5位战士，而Jeana就饰演Sailor Moon。当被傅颖留言问跟谁一起，Jeana即求饶表示「老公，别呷醋！」，十分搞笑。

方媛
无独有偶，「天王嫂」方媛都系扮Sailor Moon，更留言说出Sailor Moon的变身咒语「月棱（棱）镜威力」，不过原来她昨晚只留喺屋企「变身」，冇出去玩。

王子
王子（邱胜翊）拣咗《名侦探柯南》入面嘅「怪盗基德」，更表示自己有个「柯南魂」，唔知Stephy又满唔满意呢位怪盗男友呢？

沈月
邱淑贞大女沈月扮演游戏《英雄联盟》（League of Legends）的九尾狐「阿璃」，露出香肩同长腿，有妈咪嘅优良基因，「最美星二代」当之无愧。

庄韵澄
准人妻庄韵澄（Xenia）就化身成女警，条裙心口位绝对系一大亮点。Xenia早前表示婚后会减少行性感路线，巴打们快啲把握最后嘅福利嘞。

防弹少年团
自17年起每年都会扮鬼扮马的防弹少年团今年回归经典Style，七子一人笠一块白布扮鬼，挡住个靓仔样。不过睇返佢哋啲旧Halloween相，之前好似著得认真啲喎。

宇宙少女
韩国女团宇宙少女小分队「Chocome」成员秀彬、Luda、多荣、夏天最近推出新歌《Hmph》，四人昨日以南瓜Look上音乐节目应吓节，可爱程度100分。

大辉@AB6IX
韩国男团AB6IX的成员大辉扮成吸血鬼，卖点唔系服装，而系化妆。特别系额头中间嘅子弹窿像真度极高，唔少ABNEW（粉丝名）都直言吓亲。

Celine Dion
天后级歌手Celine Dion以《魔法保姆麦克菲》主角Nancy McPhee的造型庆祝万圣节，一身呀婆打扮完全变咗第二个人，差啲唔认得系佢！

Jimmy Fallon
金牌主持人Jimmy Fallon以吸血强尸Look现身，两只吸血獠牙当然系重点，加上张牙舞爪嘅动作同黑白Filter，以为自己睇紧旧电影Cap图。