【独家】疫情唔知几时完要自救 陈健安Book厂做处男网上Show

受疫情反覆影响，C AllStar On仔（陈健安）单飞后处男个唱《陈健安2020以青春之名演唱会》由今年2月28日改到9月18日仍然开唔成，最终落实喺11月1至7日转做网上演出。作为本土网上个唱开荒牛嘅On仔保证，网上演出唔会小规模过实体演唱会。采访：方骞平 场地：香港海洋公园万豪酒店

今次《陈健安2020以青春之名演唱会》经历两次延期，从气馁到积极筹备，On仔经已叠埋心水唔再去谂，问到做唔成实体演唱会系咪有啲美中不足？On仔：「我只系有一种想法，首个个唱要去到尽，有啲All in one心态，事实上唔知疫情几时完，一年后都未必做得到实体演唱会，网上演出可能系一个出头天，其实要自己救自己，让香港观众渐渐接受网上演出要收费，而今次掌握到嘅技术，将来都可以用返落实体演唱会中，今次我哋好大规模，会唱成30首歌，仲book咗一个厂，由专人嚟设计演出场地。不过，最初做系会有啲压力，𠵱家有晒方向成个团队好有信心，反而好Enjoy。」

设数码座位增互动
今次网上演唱会包装成一连7日《本原祭》招待本原族（On仔歌迷），除On仔外，还会同喜爱单位，如鸡蛋蒸肉饼、TheHertz、雷同二友、Greytone的Keni、NovelFriday，还有一位做影像的Tezzz Crossover，一起Jam歌，不过就冇预C AllStar 3兄弟：「畀佢哋唞唞啦，留待合体时再演出，今次系我个唱，成个Rundown有好多自己想唱嘅歌，不过，佢哋经已喺我心入面，我声音、灵魂入面都有佢哋喺度，永远搣唔甩，化灰都睇到！」虽然冇预演出，但三子会做座上客，「疫情下大家都冇乜嘢做，佢哋唔会唔睇呀？今次我哋设计咗一批数码座位，我可以同呢班观众互动，不如叫佢哋『上座』，我唔除衫，由佢哋除，其实都几有趣喎！」