【独家】疫情下大觉悟忘记旧仇 洪永城唔开心事勿放喺心

由洪永城(Tony)主持及张志明监制的TVB节目《你还好吗》，探讨喺疫情下，东南亚及欧美等地人民嘅生活有乜变化。Tony坦言亦有所启发，学会要「清空」自己：「呢个疫情，人与人之间好似多咗道门咁，社交系需要距离，但爱同关怀系唔需要距离嘅，发觉仇恨原来都系小事嚟，唔会再摆喺心！」采访：方骞平

疫情下，洪永城坦言都有所启发：「疫情前对朋友及家人忽略咗关怀，所以呢个时候，都有向世界各地朋友发出问候讯息，有啲成十年冇联络，之后遍布世界各地嘅家庭群组嘅互动都会多少少。」问到跟亲友疏离会否被误会红咗变冷漠？Tony即解画：「佢哋明白我好忙，不过𠵱家开始谂，点解同亲友嘅关系冇以前咁好呢？思考究竟发生过乜事？离唔开一个爱字，最后都系问一句『你还好吗？』就可以解决到所有障碍。」

一切误解都系小事
问到会否清除过往嘅误解化敌为友？Tony坦言嗰啲都系小事：「𠵱家增长咗智慧，好多嘢都唔重要，有缘份就继续，冇都冇办法，唔会摆喺个心，原来摆咁多杂物喺个心入面都唔系咁好，要谂办法去清空自己，令到自己个『背囊』再轻啲，目前无时无刻都接受新嘢，抱住一个正面嘅态度，打坐、冥想都足以清空心灵，除咗早睡早起，仲会参加网上课程进修，唔好畀自己停落嚟。」