【独家】卷入版权费风波 薛嘉麟同囝囝商场跳舞　诸葛紫岐热裤扫名牌

Neway太子爷薛嘉麟（Ernie）近日卷入版权费风波，但无损Ernie与爱妻诸葛紫岐（Marie）的心情，早前两公婆3度被《头条日报》发现到铜锣湾行名店，其中一日仲带埋大仔Arthur出街，两父子玩到跳晒舞咁好开心，另一日Marie就去了LV买手袋、DIY饰品，贵妇生活如常，有仔陪又买到心头好，咩烦恼都冇晒啦！采访：梁志明

Neway太子爷薛嘉麟旗下的星娱乐（环宇）有限公司传出版权费问题，但似乎都冇影响到薛氏夫妇心情，近月仲频频孖住落铜锣湾Shopping，买名牌买护肤品，Marie仲好好笑容𠻹。

囝囝任舞
好似早前趁Happy Friday一家三口就现身希慎广场，当日傍晚6时许，诸葛紫岐孭住约8万港元的Hermès手袋仔，独自走到贵妇护肤品牌专柜，快速擸走1,200蚊一盒共6片的逆龄眼膜；而同一时间，站在一旁等妈咪的6岁大仔Arthur就围住爹哋氹氹转，一身「蜡笔小新Look」的他先揽实Ernie施嗲功，成功冧晕爸爸任佢舞，两父子还在大庭广众玩拍手仔，又拖实转圈兼齐齐弯腰「做体操」，见宝贝仔笑到卡卡声，薛公子都露出眯眼灿笑！

玩到天黑
另一个周末，换上一身名牌「牛仔Look」的Marie，又撇低囝囝同老公到利园一期LV慢慢逛，其间佢仲好有雅兴地动手制作小饰品，当爱妻拎住个钳，逐朵花黐上一个貌似镜盒的物体时，Ernie就好有耐性地坐在沙发揿手机，不过唔知系咪太焗，佢忽然除低口罩，咁样好危险㗎喎！足足同两个Staff玩咗1个钟，Marie终于舍得企起身畀钱走人，Ernie继续笃住电话行去柜枱Join老婆，离开时女职员帮手抽两大袋战利品上车，满载而归的Marie心情自然特别靓，一见到记者仲即刻笑晒口打招呼。