【独家】残样兼驼背 　前名模跌晒Watt　Amanda S.阿姑Look黑面游铜

一众名模周汶锜、乐基儿及Ana R.等统统升呢幸福妈妈，惜同期的Amanda S.与意大利籍老公Christian Cappelli离婚后，仍在爱情路上兜兜转转，虽然7月自爆有新恋情，但至今「神秘男友」仍未曝光。为免又见光死，4字头的Amanda今次好低调，就算出街都只搵朋友陪。日前晚上，她就同女助手落铜锣湾买嘢。当日，残爆的Amanda「乌乌𢱑𢱑」用个「阿婆发夹」夹住执荫，行路仲驼晒背咁，好老态！可能男友唔喺身边心情特别差，其间助手跟她讲嘢，她都全程黑口黑面、冇乜反应，咁大杀气真系好唔Lovable罗！采访：梁志明

Amanda S.的人生好崎岖。11年，她与拍拖9年的意大利籍老公Christian Cappelli结婚，同年仲喺中环开饼店，以为爱情事业两得意，岂料婚姻3年货仔就玩完，好快饼铺亦宣告清盘！虽然火速搭上富豪男友Sam，但对方经营的批发公司前年卷入财务纠纷，涉欠债逾千万，之后Amanda有冇共患难就不得而知，不过她月前出席活动时就自爆已「换画」。

黑口黑面
所谓「事出必有因」，当年Amanda承认跟Christian因性格不合，以及生活理念出现分歧而分开，亦有传因女方专注打理甜品生意，令Christian备受冷落才致离婚。为咗饼铺，早年Amanda压力大到患上抑郁，乜都想控制的她后来又跟投资者严重分歧，最终辞去董事一职。经常与人「不欢而散」的她，如今再开甜品Pop-up店，火爆性格似乎再次「翻发」！早前晚上7时许，刚收工的Amanda与女助手一同现身铜锣湾时代广场，二人步出洗手间后，助手便边行边揿住手机撩她吹水，惟Amanda全程面燶燶、双目充满杀气，一副生人勿近咁款。

日久失修
落到地面，助手索性递部手机去Amanda面前，开心Share有趣影片，前者睇到双眼笑眯眯，后者依然木口木面，搞到助手都冇瘾收机。其间，Amanda企喺街头数分钟都冇人认出，又难怪嘅，昔日索爆名模瘦到「乾争争」，一身黑Tee衬白风褛造型更凸显了「飞机场」身形，加上岁月摧残，唔知系咪忙住做嘢冇时间保养呢？从露出的半张脸也看到Amanda的肤色明显暗淡无光。及后去附近药房买嘢，以黑色「阿婆发夹」夹住九一分界长浏海的她，仲驼晒背咁，比起同期做晒索妈嘅名模周汶锜、乐基儿、Ana R.等，Amanda真系跌晒Watt！