【独家】酒店庆祝结婚三周年 邓达智分享「夫妻」相处之道

愈嚟愈多已婚男艺人被掲偷食，经营一段婚姻唔容易，尤其同性婚姻就更难。9月9日系时装设计师邓达智（William）与医生伴侣陈梓欣（Clement）的结婚三周年，因为疫情未能出国，两人改于酒店staycation庆祝，曾确诊新冠肺炎并已康复的邓达智赞好陈医生令佢好有安全感，「我哋行到今时今日，好难得！」采访：方骞平 场地：Marco Polo Hotel

当日酒店职员好识做咁帮两人悉心布置房间，一室红白气球加玫瑰花瓣，仲有大大个英文字LOVE营造浪漫气氛。生于大家族的邓达智坦承，至今仍然有乡亲畀眼神佢睇，对他唔瞅唔睬，甚至兜路行回避他：「情况好似我新冠肺炎康复后一样，上周我同屋企人去饮茶，对面枱嘅人一直用唔友善目光眼望望，最后叫侍应过嚟要求我哋调位，陈医生好明事理，话咁样系人之常情，因为社会好多人唔太了解个病，所以情有可原。」William形容自己跑过码头，见过世界，有唔少人生经历，根本冇有怕！

人生苦短好好享受
结咗婚3年，邓达智和陈梓欣因了解而愈嚟愈爱，William分享经验之谈：「友谊系夫妻及情侣间重要元素，要用另一个角度去欣赏爱嘅人，一段成功嘅婚姻系要只眼开，只眼闭嚟包容对方，好似陈医生会容忍我嘅小脾气同埋论尽；而佢间中都会讲嘢冇尾音，语气重咗啲。虽然疫情下要喺屋企日对夜对，但我写书；佢进修，我哋反而冇乜磨擦。佢最吸引我嘅地方，系用事业作为理想，陈医生打算两年后做无国界医生，而我就跟佢过去，顺便嚟个深度旅行，人生苦短，要将旅行变成生活一部份。」至于陈医生就大赞William好有大佬风范，会照顾晒身边朋友，而且好尊重长辈。