【独家】返港密密开工好开心 乔宝宝开到口恨拍ViuTV剧集

乔宝宝难顶戏瘾，月前由苏格兰返港拍电影《时代》，紧接拍另一部中印独立电影《我男友系好差》，之后还会接拍一套鬼片。虽然喺疫情下减薪两成，但密食当三番，宝宝都好开心，佢仲有个愿望就系拍到ViuTV剧集，甚至做吓佢最拿手嘅综艺、旅游节目，ViuTV高层睇到呢篇报道就考虑吓啦！采访：方骞平

返港期间日日有工开，乔宝宝心情大靓，不过，采访当日宝宝要调整心情，以一个沉重mood拍一场颓废囝囝(南亚裔演员成家宏)炒车受伤入院嘅戏，由于伤及囝囝女友(陈欣妍饰)，未来亲家杨卓娜去求乔宝宝拆散鸳鸯，饰演成家宏好友嘅岑珈其就加以安慰。

用手食饭唔习惯
独立电影讲述一个中国籍少女同印度男孩喺香港发生嘅爱情故事，并带出香港及印度独有文化。因为故事背景发生系南印度家庭，当地习俗要用手去食饭，有场戏要徒手食咖哩饭，宝宝食到手指甲边都变咗黄色。问到喺疫情下要用手食饭会否唔太卫生？宝宝即解释：「我哋有洗手，而且镜头有迁就，虽然我都有少少唔习惯，不过戏中老婆同新抱就食得津津有味。」

另外，刚求婚成功嘅岑珈其由屯门扑去新蒲岗，只系拍咗几个Shot就收工，他表示疫情下最紧要有工开，搵得几多老婆本就搵几多。而杨卓娜知道姨甥女「小珍珠」出现厌奶期，她叮嘱杨怡唔使过度紧张，可能吹冷气太多引致肠胃不适，建议阿怡用熟鸡蛋加银戒指帮BB碌吓头、颈、肚，有助小朋友血气运行。