合作拍片教整绿茶甜品　陈凯琳想拜黄智贤为师学煮嘢

人妻陈凯琳（Grace）不时捉埋啲好姊妹去学整甜品，间中仲会亲自焗蛋糕送俾好朋友，而制成品唔只见得吓人，更Fancy得直达「专业级水准」！近日，Grace就跟黄智贤（Ben）一起拍片教整「Matcha muffin」和「绿茶红豆冰」，Ben表示：「原来我哋除咗拍剧，连烘焙都非常合拍！」Grace今日亦于IG转载预告片，并留言：「第一次见到Ben喺IG煮嘢食嘅片段就好想拜佢为师，之前同老公（郑嘉颖）去食饭已经见识过佢嘅厨艺⋯一个字：掂！所以好开心佢欢迎我嚟到『黄智贤快乐厨房』一齐玩！除咗我好锺意食嘅甜品之外，佢仲教识我整网上出名嘅『400次』抹茶鲜奶！真系好creamy，好好味呀！大家如果有机会整我哋呢两个recipe，记得#黄智贤快乐厨房 等我哋都睇到你嘅作品呀！」一众网民及圈中好友唐诗咏、锺嘉欣等都纷纷表示「好想食」！