【独家】拍拖即迫叶佩雯学滑雪 Eric Kwok自爆老婆痛到喊

Eric Kwok（郭伟亮）最近推出以有型为主题新歌《Ripboy》，而他觉得世上最有型的事莫过于滑雪，MV更专登飞北海道多次拍他滑雪。这是他加入陈奕迅旗下公司后第一首歌，好多谢老板支持他做自己锺意音乐。Eric谓8岁便迷上滑雪，跟叶佩雯拍拖初期更迫对方去学，搞到女方狂跌亲痛到喊都唔敢出声，幸好现在两人都爱上这运动，今次MV老婆还亲自操刀帮手拍。采访：杜淑霞 发型：Adrian Tong@private i concept store 化妆：Annie G. Chan 服装：Sacai

新歌无论作曲、填词、编曲和监制Eric都全程参与，就连MV他都亲自执导，虽然要兼顾的事好多，但他坦承乐在其中，「锺意做嘅嘢，真系唔觉得辛苦，反而好享受自己一手一脚去做，好彩填词方面有林若宁一齐构思，编曲方面就搵咗张子坚帮手。」

讲到MV，Eric更加大阵仗搵来老婆亲自操刀帮手拍摄，「虽然老板支持，都要悭钱㗎！所以除咗搵当地识得滑雪嘅朋友帮手，帮我拍摄难度高滑雪嘅动作之外，事前我借咗Kevin仔只航拍机，仲特训埋Grace（叶佩雯）控制航拍机帮手拍。」而MV中更加挑战自己，去返几年前跌断手臂的位置拍摄，Eric忆述：「重回旧地见到那条曾经令我断手嗰条铁，好像见到一只大怪兽，我不停同自己讲要征服佢。最后不断尝试，最终将成功嘅画面收录喺MV，对我嚟讲系好有纪念价值！」



提起滑雪就兴奋的Eric，更自爆如何迫老婆也爱上这运动，「我每年都会抽时间去滑雪，所以初初同Grace拍拖，我讲明要同我一齐就要识滑雪，由于系热恋期，佢好努力咁学，后尾我先知当时佢不停跌亲，痛到喊都唔敢出声，好在后尾佢都学识咗，亦都咁锺意，其实我都影响咗好多身边朋友迷上呢个运动，大家一齐玩真系特别开心。」另外，Eric话疫情好多工作都停了，好彩他平日都宅，同埋做音乐都爱留在家，所以影响不算太大。