【生日快乐呀】关心妍帮囡囡搞4岁生日会 惊喜环节寿星妹第一次食糖

关心妍(Jade)个囡囡杨荣心（Jovia）寻日四岁生日，因为Jovia好锺意面包超人，为𠱁囡囡开心，做阿妈嘅当然谂尽计仔，首先搵公司吹咗好多个面包超人角色嘅吹气公仔，然后再约埋长辈及亲友齐为心心开生日会。

布置好晒就召唤寿星女出场，戴住粉红闪闪皇冠及着住桃红纱纱裙嘅心心一见到个厅放晒面包超人已经笑晒，妈妈问佢开唔开心?佢怕怕丑丑咁答开心，然后妈妈锡啖佢再讲Happy Birthday，之后心心行去礼物堆，仲兴奋过佢嘅关心妍捉住囡囡问佢点解咁冷静?然后再问佢锺唔锺意，囡囡答钟意，好似一般阿妈咁，关心妍再追问又几钟意?其实点答啫，但佢个女好叻笑笑口答好锺意，阿妈终于满意个答案。

全日生日会嘅最精彩环节就系寿星女食糖，有几精彩呀?冇错，精彩嘅地方系心心活咗4年，第一次食糖，见佢拎住支红色棒棒糖好肉紧咁咬，阿妈即教佢要慢慢含，再问佢系咪第一次食糖，心心即点头，然后背后所有面包超人公仔及生日礼物都唔及口中嘅糖，最后环节当然就系唱生日歌同切蛋糕，翻查资料，心心三岁嘅生日会都系以面包超人做主题，下年五岁生日会，关心妍要再谂吓计嘞。