【独家】有富商老窦及3亿阔少男友　34E新咪神胡美贻发围靠自己

2017年参选港姐时，胡美贻（Nicole）虽然大热倒灶，但凭于J2节目《3日2夜》大晒34E火辣身材，获网民封为「新一代咪神」！不过见阿女抛头露面劲性感，在美从商的富爸爸似乎唔多Like，仲「咒」她早日破产执包袱返美国，但好胜的Nicole表示会努力搵钱，继续追演员梦，更扬言：「我冇乜底线。（可拍牀戏？）唔系真嘅、有打底保护就得！」撰文：黎宝伦　摄影：李维隆　服装：Gourami

胡美贻4年前获父亲打本100万做生意，然后她在马来西亚买下30亩的榴槤地，并于香港开铺卖榴槤甜品。年仅26岁的 Nicole目前已有3间分店揸手，生意做得有声有色，无奈年初爆发疫情致收入大减，加上幕前工作停足4、5个月，担心到她经期乱晒！不过有富爸爸撑使乜怕?Nicole即谦称并非「有钱女」，自己搣紧储落的钱，又谓16岁在美国读书时已半工读，一切娱乐消遣都是使自己钱，她说：「基本生活要Maintain，奢侈品就梗系自己搵啦，无理由摊大手板问人攞。」

老窦睇死
提到3年前不理父亲反对回港参选，Nicole无奈表示至今仍不获对方支持入行，「以爸爸角度睇就唔想个女咁样，佢有佢嘅担心都正常，我只会话畀佢知我会安全同做自己开心嘅嘢。（有畀限期你发明星梦？）佢话『睇你几时破产』，哈哈！（佢觉得）我冇钱就会返去搵佢，所以冇话几耐，我都会努力搵钱。」记者笑指嫁入豪门便不怕破产，跟3亿阔少Reeve拍拖大半年的Nicole称未到谈婚论嫁阶段，又自言事业心重，先专注工作，「希望饮食生意同幕前工作可以平衡到，但重心一定会喺演艺方面，始终好多嘢要学，都想吸收多啲经验，演戏系我嘅兴趣。」

事业心重
富家女Nicole亦唔系玩玩吓，好似早前为剧集《法证先锋IV》拍胶袋笠头戏，仲焗到面青，「每次接到任何角色，我唔会话一嚟想Show到咩畀人睇，但一定要过到自己嗰关，因为平时都锺意睇戏，而家就有机会畀自己发挥。」有传公司撤回「限奶令」，重新包装《3日2夜》于明年再出击，虽未收到通知，但Nicole好期待能参演，最想去杜拜，问男友可介意性感演出？她忍唔住笑：「男仔唔多唔少会呷醋，如果佢完全唔嬲你都惊啦，但要睇咩情况，会沟通嘅，《3日2夜》嗰啲就冇乜所谓，健康嘛。（佢有底线？）冇，但我平时出街(啲衫领)都着到颈位。（听晒男友话？）一时时，我都有原则，自己好想做嘅嘢一定会坚持。」