【新进KOL】孤独的横店美食家 刘浩龙挑战静英英云吞店

就咁嘅，刘浩龙(师兄)去咗横店拍戏，仲要系古装片，人生第一次拍古装，佢好兴奋因为好有新鲜感。开咗十几日工终于放假，师兄就一支公拎住支自拍神棍开始加入KOL大军，咁佢系边方面嘅KOL呢?系饮食界嘅。

放假嘅师兄就去搵嘢食，「酒店行出嚟呢条街，八分钟，呢条街好多嘢食，一直见到有间云吞铺好想入去试。」点解师兄咁想试?「因为好乾净，同埋永远都冇人，阿妈教落，冇人就唔好入去，但我偏向虎山行。」然后师兄真系入咗名叫财记嘅铺头，佢话睇吓佢咩料先，首先佢影吓个厨房，真系好乾净，再影店面，真系冇人，最后影吓餐牌，价钱由1.5蚊至25蚊，最贵系25蚊嘅虾仁大云吞，最平个半嘅五香鸡蛋。

师兄先叫咗碗大嘅韭菜云吞，食评系，「好食喎，个皮好薄，呢度叫亲啲饺子，个皮都好厚。」之后再叫多一碗小云吞，「小云吞仲好食，间铺冇做外卖，老板好有性格，一直目测拣食店食嘢，又成功咗一次，抵我行到身水身汗落嚟，好食。」赞完仲举起手指公。

镜头一转，师兄就调咗位坐咗喺厨房隔离，自拍自己仲见到老板，佢话好锺意食完嘢同老板倾吓偈，从而知道点解铺头咁新咁乾净，「原来间铺同我嚟呢度嘅日子差唔多，开咗11日咋，老板之前间铺喺附近开咗八年，都算系老店，好食，食到好饱只系24蚊。」讲完再喺老板面前举多次手指公，老板好嘢，师兄讲咁耐拍咁耐，佢半秒都无望过镜头。