【头条独家】疫情暂缓 一家三口公园玩到癫　梁咏琪激罕跑踢追超奔放

刚过去的母亲节，不少「星级父母」都获子女送花、送礼、陪食饭庆祝，而44岁的梁咏琪（Gigi）就倒番转，母亲节当日同西班牙籍丈夫Sergio带爱女Sofía去数码港公园放电。呢位44岁「廿四孝妈咪」仲两个钟无间断陪个女踢波、抛飞碟、丢手巾，全程疯狂大笑玩得好投入，其间还High到举晒手，「奔放Gigi」大家见过未？采访：张咏森

自8年多前闪嫁拍拖半年的Sergio，并于2015年诞下女儿Sofía后，梁咏琪便大大减产专心做贤妻良母，又不时于社交网晒混血囡囡的萌照，不少网民都大赞Sofía似足《怪兽公司》入面的「阿Boo」咁得意！眨吓眼Sofía已经5岁，由于新冠肺炎疫情严峻，一直停课的她早前随父母留在西班牙休假，直至3月初才回港，抗疫期间Sofía都好乖，得闲便在家中帮手扫地、抹枱，而Gigi就化身「疫境厨神」，整吓蛋糕、面包、手工拌面等过日晨。

巨人捉细路
见连续廿多日零本地感染个案，本周日Gigi夫妇便带囡囡去数码港公园唞气。当日下午1时许，一家三口拎齐帐篷、大袋食物会好友，Sofía到埗冇耐便同朋友仔玩得好投入，玩抛波玩到哈哈大笑，成班家长秒变「龙友」追住仔女狂影，之后Gigi仲落场玩埋一份，呢位妈咪好鬼马，见阿女追住个波跑，佢就笑晒口将个波愈踢愈远，结果搞到追空气嘅Sofía冇瘾行开！后来，众人又围圈坐地下玩丢手巾，身高1.76米的Gigi更尽显「好胜」一面，面对被追的小豆丁，她都不顾一切捧住盒嘢食大步狂追，吓到个妹猪仆住坐番埋位，场面爆笑！

玩足两个钟
中场休息，两母女就回到树荫下饮水叉电，在32度高温下跑完一轮，Gigi已跪低兼面都红晒，但好快她又企番起身陪囡囡踢波、抛飞碟；随后，全程负责睇住啲袋的爸爸终于加入放风筝，年过40的Gigi体力可谓非一般！逗留约两小时后，众人影埋大合照、执好东西便散Band，Gigi一家都乖乖戴番口罩先离开。行去攞车期间，Sergio发现有记者也即礼貌Say hi，问到囡囡送甚么作母亲节礼物？Gigi称：「都系学校嗰啲劳作。（开心？）最紧要健健康康就开心。（夜晚点庆祝？）玩咗半日好攰呀，都系同家人喺屋企食饭。」