【头条独家】ViuTV《万游攻略》玩穷游「肉偿」　强尼 陈俞希兴奋体验人生

强尼于ViuTV节目《万游攻略》中获3美女作旅伴，但陈俞希（Hailey）、潘杰宁和卢慧敏（Amy）仅得1万蚊旅费，要体验穷游人生！当中出走柬埔寨的Hailey玩得至豪，最刻苦的必定是在克罗地亚悭到尽的杰宁，而Amy就自爆于土耳其坐霸王热气球，最后仲要「肉偿」！采访：黎宝伦　服装：BLACKZMITH Optical、Nike（强尼）、Suncoo Hong Kong（潘杰宁）、STEVIE MAY at L'CARENE（陈俞希）

为悭住宿费，潘杰宁刻意选坐通宵机、通宵巴士又黐餐，「因为去得多城市，所以交通费贵咗，加上欧洲国家使费本身贵，净系买机票都冇咗一半，好多时要食Pizza，好彩我都捱得。」问有否色诱强尼出手救济？强尼说：「唔使色诱，我都有请佢哋食饭。」又爆Amy在土耳其获请坐热气球，唔通有艳遇？她即爆出一句：「唔系，我之后有付出番肉体。」语毕全场吓窒，Amy急急澄清：「系用劳力去换，我坐完热气球就帮手收，悭番港币千几蚊。（美人计？）唔关事，我好诚恳……其实我坐完先讲。」

强尼玩鬼Hailey
唯一超支的陈俞希表示劲食好嘢，「我哋成日食Fine Dine，加上唔睇价钱，后来发现开始紧绌，咪食平啲啲罗。」强尼还爆Hailey大妈上身撑遮上镜，Hailey无奈道：「因为柬埔寨好晒，大家Set紧机我咪担遮罗，强尼就系咁怂恿我：『不如你担埋把遮出镜啦』，后来睇番啲片好核突，佢仲要成日笑我。」在旁狂笑的强尼解释：「因为嗰日Set咗好耐，大家丧暴晒，我想话畀人听当地有几热，好真实。」