【头条独家】陪玩陪冲凉 岁半囝囝唔闷得　林芊妤拖老公出街买玩具

30岁林芊妤（Coffee）自18年下嫁银行高层翟志荣（Weng），再火速诞下儿子翟德彦（翟伯伯）后，一向锺意喺ig晒「最强Body」的她，随即变成「晒B狂魔」，日日Po囝囝萌照。眼中只有阿仔的Coffee，乜都以翟伯伯为先，连老公都要企埋一边！日前，她就拉埋老公去铜锣湾买玩具𠱁囝囝，本来两夫妇手拖手好鬼Sweet，但一入到玩具店老公即被冷落，睇Weng个无瘾样应该习惯晒！采访：梁志明

抗疫时期，相信都考起不少家长，除了要安排活动给小朋友解闷，出街也要想尽办法𠱁BB戴口罩！好似林芊妤的囝囝翟德彦咁，经过数星期的拉锯，1岁5个月的翟伯伯终于肯就范戴口罩。不过，近期新冠肺炎确诊个案明显大幅上升，Coffee都减少带囝囝外出，身为瑜珈教练的她就日日于家中，跟两父子一齐做运动、瑜珈Keep fit，见阿仔「宅」喺屋企咁闷，早前Coffee更牺牲色相，将靓样当画纸任由翟伯伯摆布，结果块面被画到花喱碌。

专注拣玩具
在家中玩到冇嘢好玩，日前Coffee就撇低囝囝，与老公到铜锣湾买嘢𠱁仔开心。当日下午5点几，夫妇俩以一身夏天Look现身街头，难得过吓二人世界，他们全程都Sweet爆十指紧扣，虽然等过马路期间，Weng一度松开老婆只手揿电话，但笃咗几吓，他好快又拖番实对方。步行至皇室堡，「阿仔大过天」的Coffee直接走入玩具反斗城，替翟伯伯物色新玩具，其间Coffee都好细心地逐件拎起研究，仲踎低慢慢拣，间中亦会手指指问老公意见，不过Weng似乎就冇咁讲究，企埋一边讲电话又发吓吽逗。

知衰𠱁老公
又难怪咁无瘾嘅，之前Coffee都讲到明：「他（儿子）出世前我根本不知何为真爱啊老公！」囝囝同老公喺屋企的地位高低，真系一目了然！最终逛了近1个钟，Coffee揽住一Set迷你羽毛球套装、一大支泡泡水和一大盒《Toy Story》吹泡机去畀钱，虽然Weng的参与度劲低，但离开的时候，大大只的他都有帮手做苦工。见老公孭住个布袋，另一只手又抽住大袋战利品，她都好识做，喺搭扶手电梯时Back hug对方，之后更主动抢番个布袋嚟拎，Weng都即刻冧晒，同老婆十指紧扣坐地铁归家。