前世情人黐实爸爸 呷醋符晓薇向陈柏宇「开拖」
2020-05-25 10:30 
「晒B狂魔」陈柏宇(Jason)经常拍片分享妻女生活点滴，昨天趁出街前又开live，片中老婆符晓薇嬲嬲猪话not happy、好hurt！原来系玩呷醋。Jason趁老婆行开咗，就细细声爆料话因为岁半大嘅「前世情人」陈羿辰成日叫住及跟住爸爸，搞到老婆冇晒瘾。
接近半小时短片中，陈羿辰的确黐到Jason实。跟住爸爸入洗手间刷牙、去衣帽间等，仲坐埋爸爸大髀陪爸爸搽cream、甚至换衫都要爸爸哄…符晓薇多次叫BB过来都被拒，她无奈说：「好灰呀，放弃，以前羿辰喊住要我抱，𠵱家未瞓醒就叫住爸爸，做乜都要爸爸抱…」当化紧妆嘅符晓薇听到房外Jason叫羿辰big hug爸爸，她带点忟憎，大大声说：「唔好再搞呢啲嘢！话你听，你要同佢冷淡啲呀！」又指控Jason成做好人角色，Jason反驳话唔系：「唔系喎！寻晚食饭我闹到佢癫喎！」符晓薇即说：「你食...啦！呢啲唔系闹，仲喺张床同佢玩，佢个样几轻佻浮躁呀！」
符晓薇再有感而发说：「你哋叫我追多个囝，万一唔小心又系生个女，佢哋三个黐埋一齐，得返我自己一个咁我咪好灰？𠵱家我女又冇，又冇地位，动力资源只系买嘢，唔买嘢做乜？」
她又再爆料：「我老公话要队冧我，因为我系屋企最大使一个，佢话请多两个姐姐仲平过我！」Jason见老婆火火地则加以安慰：「其实我只系用经济角度出发，以人情同爱嘅角度，梗系唔会咁啦！阿囡唔系唔要你，佢瞓觉时需要你！」
最新回应