【头条独家】男客意淫留言撩供另类服务 黄榕拒受高价私人教健身
2020-05-22 22:00 
喺新冠肺炎疫情下，禁止8人以上聚集嘅「禁聚令」再延长至6月4日，靠开班教操蜜桃臀及腹肌嘅黄榕，手停口停咗几个月，就算健身室重开，每堂学员唔可以超过7人，收入大缩水！虽然要节衣缩食，但39岁的黄榕强调唔会行歪路赚钱，她谷气表示曾有男人私讯她，除向她大讲超意淫说话外，还希望付高薪请她上门私人教授健身，黄榕决绝Say No：「除咗惊，我都唔系赚呢种钱嗰啲人罗！」采访：方骞平 摄影：李维隆
黄榕日前穿上萤光黄色运动Top加紧身运动长裤去观塘海滨公园做户外瑜伽，期间做出多个肢体平衡、弯身及伸展动作，就算迈向40岁，擘髀做大字马、一字马及单腿撑直等全部冇难度。因为日日做运动，黄榕三围Keep住32C、23、33，「做户外运动最好，唔使钱，有时会带埋贵妇狗落公园，当佢系哑铃咁举，佢都有成5.6 kg，好有肉地。」因为长时间操练，黄榕有晒马甲线、人鱼线、六嚿腹肌同蜜桃臀，原先今年4月会再挑战香港健美小姐大赛圆冠军梦，但已延至10月。
唔做不德道交易
因为之前所有内地登台及健身班全部取消，黄榕损失最少6位数字收入，即使𠵱家主持面包台嘅节目《榕走脂肪》，仲陆续教返班，但每班学员人数受限制，收入少咗大半，「我只得私人健身教练牌，申请唔到政府嘅抗疫基金，唯有食同住都黐屋企人，期望政府尽快派发一万蚊，对我嚟讲都可以使好耐，除咗车费平日都冇乜支出，连饭都喺屋企食。」提到会否考虑转做上门私人教授，黄榕就耍手拧头话惊惊：「有个外籍男及23岁嘅𡃁仔私讯提出过，原先我每堂收开1500蚊，佢哋愿意畀多双倍钱及车资，但有附带条件，外籍男本身喺我公司上堂，但佢想我着高踭鞋同埋低胸啲，上门教佢，又好想上完堂帮佢按摩，至于个𡃁仔就有露骨留言，我完全冇一刻心动要赚呢啲钱，我都唔系赚呢种钱嗰啲人。」
唔介意再畀人呃
对于近排娱乐圈涌现大批贱男如罗志祥、马天乐及黎振烨，拍过无数次拖的黄榕对此零感觉，因为佢以往嘅男朋友全是贱男：「拍拖以嚟未遇过好男仔，个个都系贱男，不论有钱、冇钱、靓仔、唔靓仔全部都花心，贪新忘旧，因为男人本性系花心，见一个爱一个系家常便饭，所以自己睇得好开，唔介意再畀人呃，𠵱家开心最重要，最紧要有大只靓仔『小鲜肉』陪我做运动，唯一真系接受唔到男朋友瞒住我做多人『运动』罗，好污糟，好呕心！」黄榕表示以前年幼无知，对拍拖好有幻想，虽然拆穿前有质问过对方(唔想开名讲)，但佢唔承认，咁我就相信佢，直至爆片爆相，轰动全港我先知道，不过当时经已分咗手，但仍好唔开心，觉得佢好dirty。」
最新回应