做埋新手猫奴 单身江美仪寄情宠物大满足

向来系「狗奴」的江美仪喺三周前做埋「新手猫奴」，最近经常喺IG大晒两个月大猫女Tasha嘅可爱靓相，白底淡灰色毛嘅Tasha精灵活泼，可爱到不得了，加上呢只「孻女」比家中小狗哥哥及姐姐聪明得多，好快成为新宠儿，冧到爆嘅美仪说：「哎呀，佢攞我命呀，又靓又聪明！」

 

今次养猫纯粹系缘份：「我从来都唔锺意猫，直至有次行山，喺士多度见到Tasha嘅孕妈，佢妈妈都好靓，咁我就锺意咗猫，知道佢生咗10几只BB后，就特地去拣咗只同妈妈一模一样嘅饼印BB收养，只猫BB就系Tasha，佢得意同靓到呢！𠵱家我后悔拣得一只咁少，至于将来会唔会再养多只猫就随缘啦！养猫前我搵咗传心师同我家嘅Tina、Teddy及同住妹妹养嘅Jack、Simon倾晒偈，沟通咗先，暂时4狗都接受呢个家庭新成员，Tina仲会守护喺Tasha笼门口，我谂佢哋识得交流。」

 

充满爱心嘅美仪寄情动物，单身得相当Happy，讲起猫狗经就停唔到口：「猫好聪明，暂时觉得比较独立，因为要等佢适应环境，暂时先困笼隔离，但佢只得六个星期大嘅时候，就识得开笼门出去玩，问佢嘢仲识答我添！𠵱家只好喺笼门度加锁。」