变身凑仔公林盛斌陪子女玩新娘抛花球

2020-05-13 13:00

政府日前宣布各个年级于本月27日起分阶段复课，不过距离复课仲有一段日子，林盛斌（Bob）嘅3女1子仲可以尽情玩乐，加上喺疫情下阿Bob冇咁忙，不时变身凑仔公，齐齐玩角色扮演，增加亲子关系。昨晚阿Bob上载一条同仔女玩结婚抛花球短片，Bob留言：「玩到冇嘢好玩系列...... 个人好欣赏大家姐条婚纱裙，好认真。」片中由11岁大家姐林霏儿（Faye）用被铺做嫁衣，「新娘子」企喺床上准备抛花球，由阿Bob做返婚礼司仪老本行，兼任埋摄影师，阿Bob投入地用司仪腔口说：「好啦，跟住到新娘子准备抛花球嘅时候喇！啲姊妹经已喺度喇喎！Hello！新娘子准备啦喎，睇吓边个接到呢个祝贺先！」霏霏兴奋和应说：「准备好未？」跟住两父女数完123后，花束应声著地，花散落地毡上，结果由二妹熹熹瞓身抢到，细女机机和孻仔唯有执地毡花瓣，十分好笑，不过，四姊弟都兴奋到弹弹跳，劲开心。」连阿Bob都忍唔住笑说：「哈哇！恭喜晒！」

其实在停课期间，阿Bob四子女都乖乖咁留喺屋企，三个乖女除咗温习、做功课外，还懂得自娱，大家姐霏霏仲教妹妹打麻将打发时间，又讲故事畀细佬妹听，咁识得照顾弟妹好令父母感动。