【头条独家】同文颂娴隔17年再谈情欧锦棠睇片爆喊吓亲老婆

2020-04-13 22:55

欧锦棠监制兼主演、以空手道做主题的ViuTV新剧《打天下》，本周开始播出，今次阿棠搵来02年《烈火雄心II》演情侣大受欢迎的最佳拍档文颂娴，再合演师兄妹。两人虽然相隔多年冇合作，但埋位默契依然，剧中两人感情唔再玩轻松搞笑，反而好刻骨铭心，阿棠仲自爆睇片时，一度爆喊吓亲身边老婆万斯敏。采访：杜淑霞

阿棠和文女早在亚视年代已合作演情侣多次，而最后一次合作是05年TVB剧《惊艳一枪》，之后两人都鲜有联络，阿棠想起搵文女原来是睇ViuTV节目，「见到佢上周家蔚个节目，原来佢仲会做幕前，咪试吓搵佢罗！其实我哋真系好多年冇联络。」文女就话：「佢算系我最佳拍档嚟，所以只要佢就到时间畀我凑女就冇问题，同埋佢份人要求高，佢有份监制，制作一定认真啦！」

后期险受疫情影响
相隔多年冇合作，阿棠绝对冇后悔搵文女演出，「文女第一日开工，导演兼监制高林豹都话，你真系冇搵错人呀！」文女亦话：「真系好奇怪，虽然咁多年冇合作，但系一埋位默契就返嚟。」02年《烈火雄心II》阿棠和文女由师母和徒弟发展的感情，既轻松又搞笑，不过今次演师兄妹产生的爱情又是另一种味道，阿棠解释：「我哋呢段算系剧中最完整嘅一段感情线，系刻骨铭心嗰种。」不过文女强调，「我哋唔会做埋啲好骨痹嘅嘢，好呕饭嗰啲戏我做唔到㗎！」阿棠仲自爆做后期时，睇两人感情戏时吓亲老婆万斯敏，「嗰日我老婆睇紧电视，我就坐喺侧边睇片，点知睇到我哋喺凉亭嗰场戏，忍唔住喺度爆喊，嗰吓老婆都畀我吓亲呀！」棠哥又话疫情影响了该剧在北京后期工作，好彩最终赶得切；而文女的7岁囡囡由于停学在家，她就忙于陪囡囡上堂及解闷。