【头条独家】苏格兰过五星级隔离生活 乔宝宝有几声咳好惊中招

新冠肺炎全球大流行好易中招，香港土生土长嘅印籍艺人乔宝宝喺3月26日已顺利返抵苏格兰「交人」，但坐完长途机后翌日出现喉咙痛病徵，仲有几声咳，宝宝坦言都几惊，觉得好攰，无神无气摊喺床嘅宝宝表示：「好彩饮咗几剂乔嫂嫂炮制嘅姜黄粉牛奶后病情有改善，但仍然密切监察中，唔可以掉以轻心。」虽然要隔离，但乔嫂嫂超好服侍，一日三餐有鱼有鸡送到宝宝的隔离房门口，堪称五星级隔离生活。采访：方骞平

返抵苏格兰享受家庭乐的乔宝宝正展开14日嘅家居隔离生活，成面须根的乔宝宝拍片分享「禁闭隔离14日无福利」的生活：「乔嫂嫂同我讲：『呢张床系你㗎喇，呢14日你食自己啦！』佢搬咗去同细仔瞓。朝朝起身就探热，睇吓有冇烧，因为返到嚟第2日有小小喉咙痛同咳，都以为濑嘢，所以老婆出入送餐时，我都要戴住口罩，费事传染到屋企人。」

古法配方舒服晒
因为饮咗老婆的爱心姜黄粉牛奶，宝宝舒服返晒。「呢个系医伤风感冒同关节痛嘅古法配方，一杯350ml牛奶加一汤匙姜黄粉就得，姜黄粉我多数喺印度店铺买，再落啲蜜糖咁会好饮啲，瞓觉前饮就最有益，但我都有密切监察住，睇吓病情有冇再严重，事关平日我都会有几声咳，而且冇发烧又冇肚屙，冇理由得几声咳就去求诊。」闷闷地的宝宝自拍独守空房状况，佢透露平时喺「隔离睡房」上网，或者打电话畀亲友解闷。宝宝笑言以往好少打畀亲友讲电话，「佢哋唔知我闷，仲赞我好有心。」

自己洗衫自己晾
宝宝房间对面就是细仔房，为安全起见，佢同细仔要隔住两道门倾偈。「佢间房设备非常齐全，有电脑同电视机，仲好过我，不过我都ok嘅，独享套厕，仲有淋浴间，虽然有须刨，但我冇剃须，呢度都唔使见人。」语毕，他打开大柜检视：「平日会见到乔嫂嫂啲靓衫，𠵱家得返我嗰啲。」镜头一转去到后花园：「老婆锁咗我喺后花园叫我自己洗返自己啲衫同自己晾埋，呢度啲衫全部系我嘅，咁都啱嘅，最惨要自己烫。每次都要清晒场，我由后门入去洗衫，乔嫂嫂唔畀我由正门出入，佢话：『呢两个礼拜你都冇运行！』」

隔离餐单好丰富
宝宝坦言返到屋企，见到屋企人好开心点会闷吖！虽然只系远距离见过大仔「印度豹」及医师新抱仔，但都开心到晕，唯一喺隔离期间未见过年老妈妈。他又指乔嫂嫂一日送上三餐，餐单有咖哩鱼、咖哩四季豆、咖哩鸡配薄饼及意粉，仲有香料奶茶及姜黄牛奶加蜜糖：「我唔使讲想食乜，佢会自动自觉，佢知我锺意食乜饮乜，一日三餐都提供唔同食物，我梗系话佢整得好味啦，又唔使我下厨，总之舒服过住五星级生活。」