【头条独家】齐出处男歌唔伤和气　AL Jer AK坚持以Mirror为本

组合Mirror继「人气王」姜涛及陈卓贤推出个人单曲后，近日另有三位成员包括跳得嘅卢瀚霆（Anson Lo）、唱得嘅柳应廷（Jer）及多才多艺嘅江熚生（AK）都出处男歌。三人异口同声话就算单飞都以Mirror为本，唔会伤和气。采访：方骞平 发型：King Lee@Private i salon 化妆：Giann及Yumi @Annie G.Chan makeup centre Styling：Felix Wong 服装：Levi’s

Anson Lo载歌载舞处男单曲《一所悬命》属度身创作嘅快歌，鼓励大家追求梦想，唔好介意任何抨击，坚持做好自己。Anson Lo话第一首歌想Show自己嘅强项即系跳舞，而对于首次作曲觉得好大挑战同好梦幻：「第一晚作曲时都好惊，唔知点开始好，曾怀疑参与作曲啱唔啱，怕耽误件事，监制叫我一齐谂好个beat先，原来创作唔系靠天份，只要大胆，鼓起勇气就可以成事。」

Mirror有深厚感情
阿Jer的《水刑物语》系首失恋情歌，就算失恋几唔开心都要走出伤痛，唔好再沉沦，带畀观众正面讯息。新歌MV由经理人花姐「加持」亲自执导，他自言唔熟水性，要克服潜落水拍足三小时都几惊恐。至于AK新歌《特登》同样系跳唱作品，MV加入戏剧元素成为微电影，尤以他咀女主角额头一幕惹歌迷妒忌，Anson Lo及Jer则齐齐取笑AK，话顶唔顺他于MV中的恋爱怕丑样。三人强调一齐出歌唔会成为劲敌，除咗歌曲风格及市场唔同外，大家目标都系想齐齐做好Mirror，因Mirror喺《全民造星》时建立了深厚感情，会互相支持大家。