【头条独家】搵绯闻女友做微电影主角 麦秋成赞蒋家旻够专业
2020-04-02 20:03 
麦秋成继去年宣布签约TVB，最近再有新搞作，自编自导自演爱情微电影《恋恋季节—冬至篇》，仲邀请了绯闻女友蒋家旻和好友罗天宇组成三角关系。秋成谓一直对导演工作有兴趣，想储多点经验，未来目标是拍套代表香港的歌舞电影。讲到跟蒋家旻合作，他坦言不怕绯闻愈传愈盛，更大赞她跟罗天宇够专业，两人任他舞。撰文：杜淑霞 摄影：李维隆 发型：Jay Cheung @ Hair 服装：Amelie Street 场地：Wahaha Partyroom
秋成坦承想向导演之路进发，因现在工作都未能满足到他，「我好贪心，但系喺创作上，我全部嘢都系围绕跳舞，我脑入面有3、4个故仔，𠵱家写紧啲电影剧本，有一套搵紧人投资，但一定全部关于跳舞，呢个根唔会甩嘅，我想试多啲嘢，希望将来做到一套代表香港嘅歌舞电影。」
望搵到投资者
之前秋成都导演过其他作品，但都以跳舞为主，今次较多文戏，反而难倒他，「所以要练，今次系多咗好多经验，好彩佢哋（另外两位主角）畀我舞罗！佢哋真系好好冇乜怨言，可能我听唔到，佢哋两个都辛苦㗎！我哋得几日时间，但要拍好多嘢，佢哋去到真系冇得瞓，我Chur晒佢哋嚟用。」问到搵绯闻女友蒋家旻做女主角，秋成就澄清他们只是同事和朋友，不过他不禁大赞女方工作态度，「TVB出嚟嘅艺人好独立，发型化妆自己搞掂，又冇乜怨言，架子又唔会摆到咁高，畀着好多艺人咁辛苦实黑面啦！」其实今次微电影秋成只完成了三分一，故事还有两辑，「点解叫《恋恋季节—冬至篇》，其实系仲有春夏同秋季，要睇吓之后有冇资金拍，今次用咗我6位数，所以我就冇啦！希望今辑吸引到人投资啦！」
最新回应