【头条独家】神隐两周 愁样现身　袁咏仪憔悴带魔童睇医生

张智霖（Chilam）早前因出席一个私人饭局而遭网民围剿，就连太太袁咏仪（靓靓）和儿子张慕童（魔童）都不能幸免，搞到夫妇俩都不敢再于社交网「露面」！神隐两星期，靓靓上周一（2日）终于蒲头到中环食Lunch，其间见她脱下口罩后，一脸苍白甚为憔悴，仲一边大啖食一边讲电话，讲到肉紧时仲翻晒白眼！之后，靓靓又会合魔童去附近睇医生，估唔到张氏一家咁黑仔，连囝囝都病埋！采访：李维隆

张智霖上月跟成龙、曾志伟、谭咏麟等出席一个饭局后，惹来大批网民不满并洗版式狂轰，更连累太太袁咏仪和儿子张慕童的Instagram（Ig）被攻击，见有人留言同囝囝讲：「对你爸爸好失望。」护子心切的靓靓都忍唔住回覆：「小朋友没有做任何错的事，可否不要这样对小朋友吗？谢谢。」本来以为大家会高抬贵手，事件告一段落，未料却引发更多批评。是非缠身的靓靓，近两星期冇Update过Ig，前日终于趁三八妇女节贴出一张近照。

抗疫做到足
上周一下午约2点45分，靓靓独自现身中环Landmark cafe食饭，未知是否担心感染新冠肺炎，她都高度戒备，刻意拣坐一二角避开人群，其间脱下口罩的靓靓没有化妆，一脸憔悴，仲不顾仪态擘大个口大啖食，之后，她又拎出手机边食边覆Message，唔知同电话中人讲紧咩呢？靓靓讲到一时皱晒眉头，一时又翻晒白眼咁，睇嚟都几烦恼。食饱后，她便从信封中取出口罩，蒙好面后再叫埋单，为免双手掂到啲污糟钱，靓靓亦选择碌卡找数。

魔童睇医生
随后，靓靓抽住个大纸袋走出门口，在街头等了约10分钟，7人车终于驶至，不过她并非打算乘座驾离开，而是接埋囝囝魔童和佣人，行到去附近的中建大厦睇医生，见魔童戴上口罩、头发凌乱，睇落冇平时咁精灵，唔知系咪咁唔好彩病咗嘞！最后等足两个钟都唔见人，相信三人应该发现了记者，故特意从另一个出口离开。