【头条独家】避「炎」有法 谭俊彦谂计陪仔女玩解闷 陈炜下厨煲靓汤男友受惠

受疫情影响，剧集《法证先锋IV》首周7天跨平台总收视高达35.7点，打破6年来首周7天跨平台总收视纪录，身为主角的陈炜（炜哥）和谭俊彦（Shaun）近日更加落力出动宣传。不过唔使宣传日子，两人坦言主力宅在家避「炎」，但唔怕闷，炜哥除睇书增知识外，仲会隔日落街买餸下厨煲汤，受惠者当然唔少得男友陈国强医生；至于Shaun就主力陪对宝贝仔女做功课，仲会谂计同佢哋玩游戏消磨时间，两人都话会正面睇当多咗假期陪身边人，同埋趁机洗涤一下心灵，为下套剧准备。撰文：杜淑霞 摄影：谭壹致

《法证》甫播出已有佳绩，除了受疫情影响，当然剧集高质观众先会继续捧场，跟炜哥和Shaun等演员努力当然有关，两人都话拍摄时日日都好似考试一样狂背书，Shaun话：「同埋（梅）小青姐唔畀改剧本，咁仲好可以好有系统去背。」不过炜哥仲多样难度，「难度系实验嗰啲，我读书嗰时冇读过化学，呢方面嘅嘢全部要掌握得好，做出嚟要畀观众睇到系纯熟专业，但差唔多Lab嗰度最细微嘅嘢都系我做，因为唔知点解我哋呢Team人好多男仔都手震。」

太专业冇得拍拖
讲到两人初次合作，Shaun就大赞跟炜哥合作舒服，「大家都识得睇剧本，识讲对白，同埋我同炜哥嗰段唔系小朋友嘅感情，佢之前有个男朋友郑子诚，几难做㗎追佢，系难处理，因为唔可能啱啱冇咗个男朋友，所以会拒绝我，内心戏反而仲难。」不过炜哥笑言，因为剧中三方面的调查人员都好专业，大部份戏都在工作方面，两人冇乜机会拍拖。对于该剧是监制梅小青荣休之作，炜哥和Shaun虽然觉得可惜，但都想对方好好休息，炜哥话：「佢其实好唔乖，我哋拍到朝早8、9点，佢仲喺公司，又唔食嘢又唔瞓觉，佢喺厂晕咗几次，所以见佢开心凑孙，过番啲舒服嘅生活，都戥佢开心。」

趁机洗涤心灵
谈到近日疫情，炜哥和Shaun工作都大受影响，炜哥说：「停晒啦！呢排都系宣传为主，大家同渡时艰啦！（有剧出但冇咗搵钱机会？）都冇辧法，大环境嚟，大家都辛苦。」Shaun话：「我本嚟要开套警匪剧，但因为要喺内地取景，所以都延迟咗，未知几时开番。」

近日不用宣传，两人坦承都会留守家中避「炎」，不过两人都有消闲方法，炜哥都承认多了时间陪男友陈医生，而不用开工仲会去街巿买餸整番两味同煲靓汤，当然男友都有份受惠啦！「我一买可能买一、两日餸，啲菜都摆到两、三日，肉就要新鲜啲。（Shaun：呢排啲菜都靓。）系呀！猪骨嗰啲就贵咗少少。（Shaun：所以我煲鸡汤。）」两人仲教大家煲咩汤水好，炜哥说：「𠵱家春天比较潮湿啲，可以饮啲去湿汤水，或者因为肺炎补吓个肺（Shaun：椰子煲鸡。）系啦，椰子。」至于
Sean为了替4岁大女谭晴和两岁细仔谭杺放电，都谂爆头，「佢哋都话闷，同佢哋睇书玩吓游戏。（有冇见爷爷嫲嫲？）隔离咗，少啲聚集好啲嘛！」难得有假期，两人都好正面谂，Shaun话：「当系个机会畀自己沉淀吓，谂吓之前未做啲咩，我成日觉得5年系个总结，你入咗TVB都5年啦！」炜哥都好认同，「做得耐真系畀唔到啲特别嘅嘢出嚟，系凭感觉去做，其实趁机洗涤吓心灵都好㗎！」