【头条独家】自问行得正企得正 邓佩仪珍惜上位避绯闻
2020-02-26 19:20 
入行6年，27岁嘅邓佩仪（Gloria）冇乜绯闻，形象入屋又讨好，而且肯搏肯捱，深得公司欢心，剧接剧未停过。拍紧嘅重头剧《踩过界II》虽然唔系女主角，但角色相当出位，剧中饰演热情大学生，还会主动生擒兼色诱「盲侠」王浩信，好有发挥。被TVB力捧嘅Gloria强调会注重个人言行，力保上位小花位置：「电视台有咁多人，靓同好戏过我多的是，所以真系要珍惜机会呀！」咁识谂，抵捧啦！采访：方骞平 摄影：李维隆 场地：北京老家@尖沙咀加拿分道
近年邓佩仪拍嘅剧集真系唔少，继《金宵大厦》、《铁探》后，仲有未出街嘅《机场特警》、《降魔的2.0》，而《踩过界II》正在拍摄中，虽然Gloria剧接剧冇乜时间休息，但她坚持想趁年青力壮拍多啲：「其实我都冇理自己系咪上紧位，讲真自己都算系幸运嗰批，电视台有咁多人，靓有靓过你，好戏有好戏过你，唯有把握机会尽做。」问到系咪会力保形象避开绯闻？Gloria答得好得体，「呢行系需要适量曝光嘅，但尽量唔好搞到自己一身蚁啦，好彩我对人唔太热情，而且喺感情上属冷静类型，所以唔易令人会错意，自然少咗绯闻。」
好锺意唱歌
Gloria又指谂返初入行时真系惊，搞到约异性朋友食饭都唔敢，「𠵱家人愈大，愈想享受生活，做返自己，只要行得正，企得正，正常社交都冇乜所谓。」邓佩仪除咗拍《踩过界II》喺角色上有突破外，她仲有个小小心愿：「原来我啲fans好锺意听我唱歌，如果可以唱到有份演嘅剧集歌曲就好喇，就算做一啲歌手嘅角色，可以开到金口都唔错，我好锺意唱歌㗎。」
最新回应