【头条独家】无惧肺炎　 爱妻带网红B游旺区　李璨琛囡囡周围摸冇消毒

近日本港爆发新冠肺炎（前名：武汉肺炎），不少人都于家中闭关「避炎」，但小朋友又点顶得顺日日「坐监」呢！？好似李璨琛快将两岁的「网红囡囡」Lucy（李元元）出名好动，试过闷到喺屋企大捣乱，搞到妈咪梁志莹（Pae）返到屋企以为发生「海啸」好苦恼，于是大前日（15日），她就带埋囡囡再游至爱的铜锣湾，出名「唔黐家」的Lucy自然High爆，其间不单止手仔周围摸，仲喺商场的儿童游乐区「瞓」身玩，可惜妈咪Pae挂佢凑佢，忘记不时帮囡囡消毒手仔，睇嚟喺呢个非常时期，卫生意识真系要再提高啲啲先得啦！采访：梁志明

新冠肺炎持续蔓延，本港确诊个案已上升至60宗，鉴于疫情严峻，未使返学的BB更加系高危一族，基本上都冇父母够胆带BB出街，就算出街只敢去远离人烟的郊外，既可「放电」又可呼吸新鲜空气，强身健体「避炎」。不过，唔系个个父母都唔使开工陪玩，面对小朋友日日屈喺屋企「坐监」发闷，一众父母都好头痕，「星级父母」一样唔例外，但系一向采取「放养式教育」的李璨琛夫妇却冇有怕，璨琛爱妻大前日如常带「网红囡囡」Lucy落铜锣湾「放电」！

模仿妈咪试护肤品
当日傍晚5时许，李璨琛太太梁志莹和友人先凑住Lucy到皇室堡的SEPHORA买化妆品，其间两位女士专注研究护肤品，「八婆仔」Lucy亦有样学样，随手拎起眼前的Lotion、香水仔细望，惜望完一轮并非试搽或试闻，而是贯彻其爱「煲粥」的作风，将个樽摆上耳仔扮讲电话，认真萌爆！同行「契妈」见状即截停，但转个头，Lucy又手多多摸吓呢样、摸吓嗰样，不过其间都冇人帮她抹过手仔。等妈咪畀完钱后，一出到门见到商场中庭的儿童游玩区，Lucy兴奋到举晒手，Pae亦好识做即刻拖囡囡去玩！

高危地方又瞓又摸
然而街度劲多细菌，儿童游玩区亦属高危地方，再加埋肺炎疫情严重，虽然两母女都戴晒口罩，放阿女落地玩前，Pae都有帮对方着番对袜仔，确保卫生，但无奈由排队一刻开始，细细粒的Lucy在妈咪唔为意下，一双手仔已经按奈不住周围摸，掂完侧边块展示牌后，落到「大水床」又瞓又揿个地下，旁边仲有唔少细路仔跳嚟跳去，交叉感染风险极高，而玩前玩后都未见Pae帮囡囡同自己消毒过双手，万一Lucy用只手仔捽吓眼、抹吓口鼻，真系随时被病菌入侵都唔定㗎！唔好话肺炎，染到其他细菌都唔好啦！不过，其实Pae都唔系完全冇防疫意识嘅，事关之后她们一行三人去了附近药房，她主力睇消毒酒精搓手液、喷雾、口罩等，不过未知是否没有Pae想要的产品呢，最终只留下联络电话便离开。