【头条独家】同余安安拍《Baby》勾起生B事 张继聪险为谢安琪撞开全村车

余安安和张继聪在刚上映的新戏《Baby复仇记》分别演准嫲嫲和星级男陪月，早已为人父母的他们，在拍摄过程勾起不少生B难忘事，好似安安姐就想起当年初三赤口诞第二胎既搞笑又紧张的情况；而阿聪就大爆当年太太谢安琪（Kay）生囝囝张瞻时穿羊水，住村屋的他紧张到想将全村车撞开搵出路送太太入院，似十足拍动作片劲夸张。撰文：杜淑霞 摄影：李权威 发型：Kelvin Koo hair_salon_hk(余安安)、Jobbylee@Leighton Aveda(张继聪) 化妆：littlewhite_makeup(余安安)、PinkyKu(张继聪) 服装：#marinarinaldi#prnetworkhk@marinarinaldiofficial(余安安)、Issey Miyaki(张继聪) 场地：九龙贝尔特酒店

现实中，安安姐和阿聪虽然冇做嫲嫲和男陪月经验，但两人自身经验对演绎角色都帮到手。安安说：「我做咗外母，其实对新抱同对女婿都一样，会锡仔女嘅另一半，所以我代入会容易啲。」由于现实中没男陪月，阿聪反而觉得更有趣，「我太太第一胎系冇陪月，但真系差好远，特别系太太身体调理方面，我好记得我Book嘅时候佢话3日后先覆，因为开工唔会开电话，好似特工咁好专业，我将佢哋份精神放咗入角色度。」

两人都话拍摄最难忘是勾起不少当日生B的经历，当年首次做爸爸的阿聪，更自爆由于太紧张，差啲出大事，「当年我哋住村屋，夜晚啲车泊好晒，要出车系好困难，太太话穿羊水，我抱去落车，但系揸出嚟好难，我好紧张，谂过将成条村啲车撞开晒佢，返嚟先搞，太太反而叫我慢慢嚟。（阿Kay冷静过你？）系呀，可能自己身体自己知，我系急到咁。」安安姐原来生两胎都一样惊险，「第一胎唔系好稳，要喺床瞓咗3个月，真系好担忧，去洗水间大力啲都惊走咗出嚟冇咗，而第二个就早产，细女初二出世，我初二传统返阿妈度食饭，我食咗3碗饭，半个钟后仲叫阿妈煎糕，阿妈仲话又食？食到塞咗个BB出嚟！点知真系食完半夜作动喎！我两胎个头都系唔调转，都系要开刀生。」