【头条独家】望成功增肥到100磅姚子羚鼠年唔心急求姻缘

2020-01-23 19:30

近排忙于为新剧《黄金有罪》宣传的姚子羚，新年总算有几日假放，决定跟「云来轩」行政总厨黄亚保学整贺年素菜「黄金满屋」，到时跟家人朋友齐齐庆祝。讲到新年愿望，猪年剧接剧加上早前患过甲型流感，令子羚瘦到得番94磅，所以鼠年除了希望演到更多好角色，最想能够增肥到100磅以上；讲到姻缘她反而唔心急，只想搵到个孝顺顾家，心地善良的有情人。撰文：杜淑霞摄影：李权威发型：Taylor Wan@Hair Corner 化妆：Henry Li 服装：[email protected]、Dearbell2ling 场地：云来轩

子羚好满意猪年发展，工作排到密麻麻，不过正因太忙疏忽了身体，「19年所有重要节目都喺工作中度假，不过做呢行系值得感恩，但系因为之前两套剧都系好需要体力，《唐人街》要打，《大步走》就跑，加上之前中咗甲型流感，瘦咗好多，嚟紧要调理番好身体，先可以努力搵钱。」

对象要孝顺顾家
讲到鼠年愿望，子羚先为大家祝福，「希望所有人平安快乐，大家多啲正能量，世界减少多啲天灾人祸。至于个人，就想新一年事业更上一层楼，同埋增肥成功，讲完系会畀人打嘅，哈哈！有人话我食素后易瘦啲，但系我家姐食全斋，佢都几丰满，所以应该唔关事，我希望由𠵱家94磅增到102磅。」至于姻缘，子羚一切随缘，「我唔会限住自己某个年纪结婚生小朋友，同埋呢样嘢唔系你付出几多努力就有几多分收获。」讲到拣对象，子羚话会感觉行先，不过仲有少少要求，「孝顺顾家好紧要，锡父母同屋企人，第时都会锡自己家庭，同埋要上进，唔系要搵好多钱，但有上进心系好，因为当有家庭又系另一样嘢。」