【头条独家】 相恋21年 哭爆同高志森分手 焦媛：需要个明白理解我嘅人

43岁的焦媛将于情人节演出全新自编音乐剧《约定香奈儿》，纪念逝世20年的父亲，她笑言到时跟前世情人共舞庆祝。不过，讲到跟今世情人高志森关系，焦媛忍不住喊住承认两人已于年多前正式分手，结束21年关系，但不涉及第三者，只是她有心结不能解开，对另一半的要求亦已改变，她现在需要个明白同理解她的人，但她强调两人工作伙伴关系不变，更表示对方一直对她好好，是她一世的老师。采访：杜淑霞

焦媛10年前曾创作《容易受伤的女人》纪念逝世父亲，今年再亲自编写音乐剧《约定香奈儿》送给爸爸，她更形容这是个自虐自疗过程，每日写剧本回忆起爸爸就喊几次。这日她在排练室先讲到跟父亲关系，「我3岁前都冇同父母生活，系婆婆凑我，我细个系缺乏父母嘅爱，直到一家四口嚟到香港，爸爸亦都被迫转行由京剧演员变成工厂杂工，虽然佢冇埋怨过，但系佢一得闲就攞啲京剧录影带睇，我见到就放咗自己情感落去，认为佢一定系好唔开心啦！觉得要为爸爸出番啖气，希望佢为我骄傲，所以我之后唔系唔锺意舞台同艺术，但系有八成系孭咗爸爸压力上身，但呢啲系我一厢情愿嘅谂法，我冇同爸爸好好对话，冇沟通过去了解佢真正感受，但爸爸系我精神价值，所以话我恋父狂我认。」

正因为多年来带着这份压力工作，焦媛年几前终于爆煲，要向心理医生求助，「佢话我永远唔满足，永远觉得自己做唔好，去到有小小扭曲，自困情绪，因为我做呢行嘅初心，八成系为咗爸爸，好唔好彩啱啱毕业有机会演戏嘅时候，佢就离开咗，我永远冇得到佢一个回应，永远搵唔到呢个答案，但我放唔低爸爸做唔番呢行系佢自己嘅命运，我要学识放低，不过唔系一朝一夕，我呢个性格都40年，点会咁快放得低，但起码知个问题喺边。同埋我亦都要重新审视同舞台艺术关系，以前努力系为爸爸，依家要谂自己想要啲咩，唔系再为其他人，用另一种心情去享受个舞台。」

拣对象唔一定要叻
这次情绪问题，令焦媛重新审视还有跟高志森长达21年的恋爱关系，「我承认我对佢系有恋父嘅关系影响，但我真正爱佢几多系纯粹爱情。不过我由细到大都睇唔起同班啲男仔，因为我觉得佢哋唔叻罗！一定要够叻，可以Lead到我行嘅，我系咁样去睇爱情，唔系触电嗰种，因为爸爸嗰时对我嘅教育系咁㗎嘛！永远都系嗰个高标准罗！但依家未必咁样去睇爱情，唔一定系要叻，反而明白你了解你，同你一齐去行，而唔系Lead住你行，Lead住你永远都系一样好辛苦嘅嘢，永远跟住后面，反而同步一齐成长仲好。」

追问这样想系咪代表跟高志森已分手，焦媛忍不住喊着承认，「真系分咗手，我哋工作关系系好好嘅，佢系一世嘅老师，但感情就唞一唞。」她又话：「佢好好，系我自己唔同阶段都有变化，以前细个20几岁好叻嘅人已经满足到我情感上嘅要求，过一段时间我又成立自己个团，佢变成工作上伙伴好夹，以为呢个都系爱情，到我40岁开始，需要一个明白理解我嘅人，女人都系咁，点解女人最终要结婚生仔，某个阶段需要陪伴，精神上嘅陪伴，咁就开始有问题啦！（系咪想搵对象结婚生仔？）我要搵到自己先，再搵个啱自己嘅伴侣，不过我仲系相信爱情。」至于两人有否复合可能，「呢个唔可以一厢情愿，唔系又变咗好似我同爸爸嘅关系，好似一个人单恋咁，感情系要双方，唔可以不停咁付出，人哋唔系咁谂呢！我成都话，你爱我，你要做畀我睇，所以沟通好紧要。」

曾传婚讯
焦媛跟高志森年龄相差18岁，2000年刚在演艺毕业、24岁的她承认跟男方拍拖，更一度背上第三者之名，最终高志森公开98年已跟太太离婚，不过两人关系初时仍未被看好，后来随着工作上合作关系，感情亦愈来愈稳定，其间亦传出过婚讯，转眼已相恋21年。