【头条独家】疫症大爆发 囝囝周街跑　苏永康一家「无罩」出动

苏永康（苏康）有仔万事足！以往在社交平台上，他都系晒吓潮物、同Friend的合照等，不过，自17年囝囝苏展弘（Jazz）出世后， Jazz的萌照几乎攻占整个Instagram，眨吓眼宝贝仔已经2岁多，苏康一得闲就会带住囝囝周围飞，见惯世面的Jazz都好活泼，完全唔怕生。日前，两父子就陪妈咪冯翠珊（Anita）返公司做嘢，惟近日内地爆发不明肺炎，一家三口却零口罩出动，其间见大人们各有各忙，忽然无王管的Jazz同朋友仔玩到冲出门口，最终被「捕」的他梗系畀妈咪闹啦，苏康咪抆一抆囝囝衫袖安抚吓罗，点知Jazz一手揈开，真系愈「抆」愈伤心！采访：李维隆

现年52岁的苏永康与任职Alexander McQueen亚太区总经理的冯翠珊结婚5年，两年多前终于迎来人生第一胎，苏康升呢人父后都变得好黐家，一放假仲会一家三口周围飞，好似上月就先后带囝囝苏展弘去泰国、日本玩，不过近期武汉爆发不明肺炎，苏氏夫妇则选择留喺香港，日前两父子仲陪妈咪去做正经嘢，惜本地亦陆续发现怀疑个案，搞到全城疯抢口罩和消毒产品，他们仍未有做任何安全措施，照一家大细「冇罩」去闹市。

囝囝大暴走
当日戴上黑超、Gel晒头的苏康，陪太太 Anita落中环置地广场的分店处理事务，同行除带埋囝囝Jazz和工人姐姐外，两公婆仲做埋「托儿服务」帮老友凑细路。甫进时装店，Anita便搵女职员坐低密密斟，苏康则自己一个行开睇吓衫及鞋，而两个「小豆丁」就当正铺头是「游乐场」，在里面疯狂追逐乱跑自娱一番，岂料玩到High过龙，笑到见牙唔见眼的Jazz竟然一支箭标咗出门口，吓到工人姐姐即刻冲出去捉住「小主子」，苏康见状都急步上前抱番囝囝，不过锡到个仔燶的他又怎舍得闹对方呢？于是「被捕」的Jazz遭「押」返妈咪身边，做阿妈嘅点都要「哦」番两句嘅。见心肝命椗唔开心，苏康都好肉痛，出手拉住挣扎逃脱紧的囝囝，安抚一下对方小心灵，殊不知阿仔唔多领情，一手揈开爸爸只手，苏康变So hurt！

冧仔有妙法
之后，Anita就使出一招「iPad专注法」，果然万试万灵，Jazz随即揸住部iPad坐定定在沙发上，静心欣赏至爱的卡通片。为了令囝囝加倍开心，「廿四孝爸爸」苏康更一度走到附近的Coffee Shop买Puff和牛角包𠱁Jazz；折返时装店时，沿途仲见到一个同囝囝差不多大的可爱妹猪，苏康都忍唔住边行边笑住回头望，唔知系咪都想追个囡囡呢？其后，苏康和Anita忽然赖低Jazz，抱住老友个仔离开！原来他们只是行去育婴室啫，估计小朋友整湿咗片片嘞，苏康家下连尿片都识换，真系要畀个Like你呀！