【头条独家】凭《多功能》最强小三弹出于淼现实冇仔好鬼宅

2020-01-02 23:10

2012年代表大连参加《国际中华小姐竞选》入行的于淼，最近凭演《多功能老婆》最强小三「颜成功」弹出，对于因在杨千嬅手上硬抢黄浩然令观众恨之入骨，甚至连浩然老婆都公开指骂，于淼相当有满足感。不过现实中的「颜爷」唔单止唔肯做小三，仲相当被动，自认好宅的她，笑言要搵监制陈宝华帮手度桥识男仔。撰文：杜淑霞摄影：李权威

于淼坦承得知要演「颜爷」时，觉得好大压力，「我系经验最少，同埋广东话讲得最差嗰个，但剧本用广东话写，惊理解得冇咁好。另外，戏入面我嘅气场劲过佢哋，但现实对住影后千嬅，浩然又咁多年经验，所以系完全相反嘅，点样做到个霸气出嚟，我自己睇番都好惊讶，加埋个妆同发型，当然仲有宝华姐（监制陈宝华）写嘅对白系好有霸气，郁吓就『滚』有呢啲对白完全帮到我情绪。」

抽离唔到「颜爷」
角色成功令于淼好有满意感，仲话唔介意畀人闹，「唔介意，佢哋都系太投入啫！我最初反而担心观众唔讨厌我，做唔到嗰份霸气。」她坦言拍完未抽离到角色，「拍完一个月发觉自己身上仲有『颜成功』嘅影子，譬如朋友迟咗少少我就发好大脾气，佢哋都觉得我以前好易话为，点解𠵱家会咁样㗎！好彩嗰时冇拍拖，唔系男朋友一定顶唔顺。」

讲到感情方面，于淼亦承认同角色好唔同，仲强调一定唔会做小三，「感觉好差，好似抢咗人哋嘢咁，就算问题唔喺自己度。」但若然另一半有小三，她亦会好包容，唔会一刀切分手，「我会同佢倾，理性去倾感情问题出喺边度。」至于对另一半于淼只要求，「大家精神沟通到，都锺意睇戏，同埋信仰要一样。」不过讲到搵对象她绝对冇「颜爷」咁进取，圣诞节都是跟闺密刘温馨一齐去教会活动度过，她笑言：「要问吓宝华姐度啲桥识男仔先得！」